ՀԴՄ-ներ կարող են ներկրել բոլորը և վաճառել իրենց ուզած գներով
ՀԴՄ-ներ կարող են ներկրել բոլորը և վաճառել իրենց ուզած գներով: Այս մասին որոշումը կայացվեց այսօր ՀՀ կառավարության նիստում:
Այս որոշմամբ ՊԵԿ-ը զրկվեց ՀԴՄ-ներ ներկրելու ու վաճառելու իր մենաշնորհից:
«Սա շատ կարևոր որոշում է շուկայի ազատականացման տեսակետից և շատ հաճախ բարձրաձայնված խնդիրներից է, որը լուծվում է կառավարության որոշմամբ»,- հարցի քննարկման ժամանակ նշեց փոխվարչապետ Տիգրան Ավինյանը.
Ընդունված որոշմամբ` կառավարությունը ՊԵԿ-ի «Հսկիչ-դրամարկղային մեքենաների ներդրման գրասենյակ» ՊՈԱԿ-ին զրկում է ՀԴՄ-ներ ներկրելու ու վաճառելու գործառույթից: Այսուհետ այդ գործառույթը կարող են իրականացնել բոլոր տնտեսվարողները,եթե նրանց ներկրած ՀԴՄ-ները համապատասխանում են ՀՀ-ում գործող տեխնիկական պահանջներին:
«Այսինքն` ՊՈԱԿ-ի գործունեությունը սահմանափակվելու է բացառապես սահմանամերձ համայնքներին անվճար ՀԴՄ-ներ տրամադրելով ու դրանց տեխնիկական սպասարկումն իրականացնելով»,- ասաց ՊԵԿ նախագահ Դավիթ Անանյանը:
Նշենք, որոշման նախագիծը կառավարության նիստի օրակարգում էր ներառվել հենց ՊԵԿ-ի նախաձեռնությամբ :