Սասուն Խաչատրյան. ՀՔԾ-ն հարցաքննելու իրավունք ունի ցանկացած անձի
Սահմանադրական դատարանի նախագահ Հրայր Թովմասյանին առնչվող նոր քրեական գործը Հատուկ քննչական ծառայությունում երեկ են ստացել, դեռևս ուսումնասիրում են: Այդ մասին այսօր լրագրողների հետ զրույցում նշել է ՀՀ հատուկ քննչական ծառայության պետ Սասուն Խաչատրյանը:
«Քրեական գործը նոր ենք ստացել, երեկ ենք ստացել, դեռևս ուսումնասիրում ենք, այդ գործով ոչ մի մեկնաբանություն այս պահին չեմ անի: Իսկ ինչ վերաբերում է անձին հարցաքննելու իրավունքին, հարցաքննելու իրավունք ունենք ցանկացած անձի», - ասաց Խաչատրյանը:
Ազգային ժողովի աշխատակազմի ղեկավարի նախկին տեղակալ Արսեն Բաբայանին վերաբերող հարցերին, թե ինչո՞ւ են միջնորդել նրա նկատմամբ խափանման միջոց ընտրել կալանքը, ինչո՞ւ են, ինչպես նա է պնդում, զրկել հաղորդակցության, հարազատների հետ շփման հնարավորությունից, ՀՔԾ ղեկավարը պատասխանեց․
«Յուրաքանչյուր կոնկրետ դեպքում քննիչ է գնահատում, թե որ խափանման միջոցն է ի զորու ապահովել մեղադրյալի պատշաճ վարքագիծը: Տվյալ դեպքում գործը քննող քննիչը եկել է այն եզրահանգման, որ Արսեն Բաբայանի պատշաճ վարքագիծը կարող է ապահովվել միայն կալանավորման պայմաններում, և նաև հենց այդ նկատառումներով արգելանք է դրվել նրա տեսակցությունների վրա»: