«Շերեմետևո»-ում օդանավի հրդեհի ժամանակ 41 մարդ է զոհվել (տեսանյութ)

Ռուսաստանի քննչական կոմիտեն հայտնել է, որ 41 մարդ է  զոհվել Մոսկվայի «Շերեմետևո» օդանավակայանում «Աէրոֆլոտ»-ի օդանավի վթարային վայրէջքի և ծագած հրդեհի հետևանքով, հաղորդում է  «ՌԻԱ Նովոստի»-ին:

Մոսկվա-Մուրմանսկ չվերթն իրականացնող Sukhoi Superjet 100 ինքնաթիռը վերադարձել է  օդանավակայան և կոշտ վայրէջք է կատարել 28 րոպե թռիչքից հետո։ Վատ եղանակային պայմանների պատճառով օդաչուներն ինքնաթիռը կարողացել են նստեցնել միայն երկրորդ փորձից։ Վայրէջքի ժամանակ կոտրվել են օդանավի կանգնակները և հրդեհվել շարժիչները։

«Շերեմետևո»-ում պատմել են, որ ինքնաթիռն օդ է բարձրացել մայիսի 5-ին, Մոսկվայի ժամանակով 18։02-ին (Երևանի ժամանակով՝ 19։02)-ին, իսկ վթարային վայրէջք կատարել՝ 18։30-ին։ 

Ուղևորներն օդանավը լքել են փչովի սանդուղքով։ Ինքնաթիռն ամբողջությամբ այրվել է։

ՌԴ քննչական կոմիտեն քրեական գործ է հարուցել ՌԴ Քրեական օրենսգրքի «Օդային տրանսպորտի երթևեկության և շահագործման կանոնների խախտումը, որն անզգուշությամբ առաջ է բերել երկու կամ ավելի անձանց մահը» հոդվածով։

Ռուսաստանում Հայաստանի դեսպանությունը ստուգում է Մոսկվայի «Շերեմետևո» օդանավակայանում վթարային վայրէջք կատարած, Մուրմանսկ-Մոսկվա ուղղությամբ չվերթ իրականացնող օդանավում Հայաստանի քաղաքացիների և հայերի առկայությունը:

«Աերոֆլոտ» ընկերությունը հրապարակել է փրկված անձանց ցանկը:

Նյութը հասանելի է նաև ռուսերեն