Լևոն Զուրաբյան. Ես քվեարկեցի նրա համար, որ խելագար Հայաստանը փոխարինենք խելամիտ Հայաստանով (տեսանյութ)

Հայ ազգային կոնգրես կուսակցության վարչապետի թեկնածու Լևոն Զուրաբյանը ՀՀ ԱԺ հունիսի 7-ի ընտրություններին քվեարկել է հանուն Հայաստանի, որը կզարգանա և դեպի ապագան կգնա ինքնիշխան, խաղաղության պայմաններում:

Զուրաբյանը նշում է, որ  որ քվեարկել է նրա համար, որպեսզի գերտերությունները չպատերազմեն Հայաստանում և չվերածեն ավերակների, ազդեցության համար նրանց պայքարը լինի միայն ներդրումներով, իսկ Հայաստանը դառնա կապող կամուրջ՝ ոչ միայն արևելքի ու արևմուտքի, այլ նաև հյուսիսի և հարավի միջև։

Լևոն Զուրաբյանը՝ հայտարարել է նաև, որ քվեարկել է մի Հայաստանի համար, որտեղ կհարգվեն ինքնությունը, պատմամշակութային արժեքները, ժողովրդավարությունը, մարդու իրավունքները, կգործեն Սահմանադրությունն ու օրենքները և որ խելագար Հայաստանը կփոխարնվի  խելամիտ Հայաստանով:

«Ես քվեարկել եմ մի Հայաստանի համար, որտեղ վերջապես կհարգվեն ժողովրդավարությունը, մարդու իրավունքները, կաշխատի Սահմանադրությունը, օրենքները, հոգևորականներին և քաղաքական ընդդիմախոսներին չեն հետապնդի, չեն նետի բանտերը, քվեարկել եմ մի երկրի համար, որտեղ երկրի ղեկավարը խուլիգան չի, այլ պարկեշտ մարդ է, որը հարգում է օրենքը: Եվ վերջապես քվեարկեցի մի երկրի համար, որտեղ հարգվում է մեր ինքնությունը, պատմամշակութային արժեքները, չեն փորձում մեր միջից հանել մեր հայությունը»։

Անդրադառնալով խուզարկություններին ու ձերբակալություններին՝ ՀԱԿ-ի վարչապետի թեկնածուն նշեց.

«Մեմ են չէ՞ դարձրել, որ ռեժիմը խուճապի մեջ է, դա լավագույն դրսևորումն է: Եթե դու քվեարկության օրը զբաղված ես ընդդիմախոսների բանտարկություններով, խուզարկություններով, ձերբակալություններով, ընդ որում, դա մեկ հոգու մասին չէ, այլ զանգվածային բնույթ է կրում: Դա ի՞նչ է նշանակում, խուճապն էլ ոնց է լինում:

Սա մեզ համար մարտահրավեր է, որովհետև հայ ժողովուրդն այսօր կանգնած է մի խնդրի առաջ, որ պետք է ապահովի սեփական երկիրը կառավարելու իր իրավունքը։

Իսկ Նիկոլ Փաշինյանի կողմից սա մարտահրավեր է, որ ինքը նետում է ժողովրդավարությանը, մարդու իրավունքներին, և, ըստ էության, ուզում է բացել բռնապետության դուռը:
Բռնաճնշումները, ձերբակալությունները քաղաքական ընդդիմախոսների նկատմամբ վկայում են այն մասին, որ կանգնած ենք շատ լուրջ վտանգի առաջ, հայ ժողովրդի կամքը պետք է լինի աներկբա, մենք պետք է թույլ չտանք, որ Հայաստանում բուն դնի բռնապետությունը», - լրագրողների հետ զրույցում ասաց Լևոն Զուրաբյանը։

Ավելին՝ տեսանյութում