«Մեզ, վրացիներիս համար, Լևոն Տեր-Պետրոսյանը հայ ժողովրդի խաղաղասեր, հավասարակշիռ և իմաստուն ոգու մարմնավորումն է»
1991 թվականի հուլիսի 27-ին Թբիլիսիում ստորագրվում է հայ-վրացական «միջպետական հարաբերությունների հիմնական սկզբունքների մասին» պայմանագիրը, որը հանդիսանում է անկախության ձգտող Հայաստանի առաջին միջպետական պայմանագիրը: Պայմանագիրը ստորագրվել է պաշտոնական այցով Վրաստան այցելած Հայաստանի Գերագույն խորհրդի նախագահ Լևոն Տեր-Պետրոսյանի և Վրաստանի նախագահ Զվիադ Գամսախուրդիայի կողմից:
Ի պատիվ Լևոն Տեր-Պետրոսյանի կազմակերպված պաշտոնական ճաշից հետո, հրաժեշտի ընթացքում, Վրաստանի նախագահը հայտարարել է` «Մեզ` վրացիներիս համար, Լևոն Տեր-Պետրոսյանը հայ ժողովրդի խաղաղասեր, հավասարակշիռ և իմաստուն ոգու մարմնավորումն է» (մեջբերումը` «Ազգ», 31.07.1991):
1993 թվականին Վրաստանում Գամսախուրդիա-Շևարնադձե առճակատման և ներքաղաքական լարված իրավիճակի պայմաններում նախագահ Շևարնադձեն դիմում է Հայաստանի նախագահ Լևոն Տեր-Պետրոսյանին, խնդրելով Վրաստանի ներքին կայունությունը վերականգնելու և «այլ երկրների զինված խմբավորումների դեմ» պայքարելու համար խաղաղարար զորք ուղարկել Վրաստան:
Տեր-Պետրոսյանը կայունության շուտափույթ վերականգնում մաղթելով Վրաստանին, վերջինիս ներքին գործերին չխառնվելու և երկու ժողովուրդների հարաբերությունները չխաթարելու հիմնավորմամբ մերժում է զորախումբ ուղարկելու խնդրանքը: