Ալիև. «Ուժն է ծնում իրավունք»
Լեռնային Ղարաբաղի հակամարտությունը պետք է կարգավորվի միայն Ադրբեջանի տարածքային ամբողջականության շրջանակներում, հայտարարել է այդ երկրի նախագահ Իլհամ Ալիևը՝ պնդելով, թե Ղարաբաղը Ադրբեջանի անբաժանելի մասն է, և Բաքուն երբեք չի համակերպվի «իր տարածքների օկուպացիայի» հետ:
«Այսօր Ադրբեջանը առավելություն ունի թե՛ բանակցային սեղանի շուրջ, թե՛ մարտի դաշտում», - ադրբեջանական Real TV-ին տված հարցազրույցում ասել է Ալիևը:
Անդրադառնալով Նիկոլ Փաշինյանի հայտարարություններին, որ Ղարաբաղը պետք է վերադառնա բանակցային սեղանի շուրջ, Ալիևն ասել է՝ հայկական կողմի այդ դիրքորոշումը աջակցություն չի ստացել ոչ Ադրբեջանի, ոչ էլ ԵԱՀԿ Մինսկի խմբի համանախագահների կողմից:
«Այսօր հակամարտության կարգավորման շուրջ բանակցությունները ընթանում են Հայաստանի և Ադրբեջանի արտգործնախարարների միջև, որոնք արդեն մի քանի հանդիպում են ունեցել», - ասել է Իլհամ Ալիևը:
Պնդելով, թե Բաքուն առավելություն ունի և՛ բանակցային սեղանի շուրջ, և՛ մարտի դաշտում, Ադրբեջանի առաջնորդն ասել է․
«Այսօր աշխարհում ուժի գործոնը դառնում է գերակշռող, «ուժն է ծնում իրավունք»: «Մենք կձեռնարկենք բոլոր հնարավոր ջանքերը մեր երկրի տարածքային ամբողջականությունը վերականգնելու համար», - հավելել է Ալիևը:
Հայաստանի վարչապետ Նիկոլ Փաշինյանը երեկ Ազգային ժողովում խոսել է ղարաբաղյան բանակցային գործընթացում Արցախի լիարժեք ներգրավման անհրաժեշտության մասին՝ վստահեցնելով, որ տեսնում է դրա «շատ կոնկրետ ձևեր և մեթոդներ»: