Հայաստանը կրկին հայտնվել է վտանգավոր «կարմիր» գոտում
Մասնագետներն ահազանգում են՝ կորոնավիրուսով վարակվածության դեպքերն այնքան են աճել, որ Հայաստանը կրկին հայտնվել է Եվրամիության չափանիշներով վտանգավոր «կարմիր» գոտում։
Հայաստանի առողջապահության նախարարությունը կոչ է անում քաղաքացիներին վերադառնալ դիմակներ կրելու խիստ ռեժիմին, քանի որ վերջին երկու շաբաթվա ընթացքում կորոնավիրուսի դրական թեստերի քանակը կայուն աճում է:
Այս մասին մարտի 3-ին ՀՀ Ազգային ժողովի նիստում ասաց առողջապահության նախարար Անահիտ Ավանեսյանը՝ պատասխանելով «Լուսավոր Հայաստան» կուսակցության պատգամավոր Հրանտ Այվազյանի այն հարցին, թե ինչու ոստիկանությունը չի տուգանում դիմակների բացակայության համար։ Առողջապահության նախարարը հավաստիացրեց, որ իրենք միշտ հետեւում են միջազգային մասնագիտական մարմինների խորհուրդներին: «Դիմակներ կրելը դեռեւս շատ կարեւոր կանխարգելիչ միջոց է»,- ասաց նա:
Նախարարը հիշեցրեց նաեւ, որ երբ աշնանը կորոնավիրուսային հիվանդությունների բավական մեծ աճ կար, եւ բնակչությունը, լսելով նախարարության կոչերը, սկսեց դիմակներ կրել, շատ լավ ցուցանիշներ գրանցվեցին համաճարակի դեմ պայքարում: «Ցածր տեմպերը որոշակի հանգստություն են առաջացրել բնակչության շրջանում, եւ շատերն այժմ այնքան էլ հետեւողականորեն դիմակներ չեն կրում: Բայց վերջին 2 շաբաթվա ընթացքում մենք վարակների աճ ենք դիտարկում:
Այսօր թեստերի 14%-ը դրական արդյունք ունի: Ուստի ես խնդրում եմ եւ կոչ եմ անում վերադառնալ դիմակներ կրելու ավելի խիստ, ավելի պահպանողական ռեժիմի, որպեսզի փորձենք կանխել վիրուսի տարածումը»,- նշեց նախարարը եւ հավաստիացրեց, որ դիմակներ կրելը շատ կարեւոր դեր ունի վիրուսի տարածումը կանխելու գործում:
Առողջապահության փոխնախարար Գևորգ Սիմոնյանն օրերս իր ֆեյսբուքյան էջում գրել էր՝ անհրաժեշտություն է առաջացել ընդլայնել կորոնավիրուսային բժշկական կենտրոնները: