ՀՀ–ում ԱՄՆ դեսպանը՝ Ադրբեջանի կազմում արցախցիների ապրելու մասին
ՀՀ–ում ԱՄՆ արտակարգ և լիազոր դեսպան Քրիստին Քվինը հնարավոր է համարում Ադրբեջանի կազմում Արցախի գոյությունը և արցախահայության անվտանգ ապրելու հնարավորությունը։ Այս մասին Քվինը հայտարարել է Հանրային հեռուստաընկերության եթերում։ Տեղեկությունը փոխանցում է armeniasputnik-ը:
«Մենք հավատում ենք և հույս ունենք, որ դա հնարավոր է։ Կարծում ենք, որ բոլոր կողմերը պետք է միասնաբար ջանքեր գործադրեն, որպեսզի դա հնարավոր դարձնեն։ Միացյալ Նահանգները կարծում է, որ դա է ճիշտ մոտեցումը։ Բոլոր կողմերին քաջալերում ենք, որպեսզի միասնաբար ջանքեր գործադրեն՝ ապահովելու նշված իրավունքները և անվտանգությունը։ Բոլոր կողմերն ասել են, որ իրենք համարում են, որ ԼՂ-ում ապրողների իրավունքները և անվտանգությունը պետք է երաշխավորված լինեն, և հիմա նրանց մնում է գտնել դա անելու, դա ապահովելու ճանապարհը»,– նշել է դեսպանը։
Հարցին`արդյոք հնարավոր է Ստեփանակերտ–Բաքու երկխոսություն կազմակերպել, Քվինը շեշտել է` ԱՄՆ–ն համարում է, որ ցանկացած քննարկում, բանակցություն և խոսակցություն առաջընթացի ճիշտ ուղին է։
Դիվանագետի պնդմամբ` մնում է օգնել, որպեսզի 2 կողմին մտահոգող հարցերը լիովին ընկալվեն ու կարողանան գտնել ապագայի ճանապարհը։
Քվինի խոսքով` ԱՄՆ–ն համարում է, որ Հայաստանը` որպես ինքնիշխան պետություն, կարող է որոշել, թե ովքեր են իր դաշնակիցները։
«Միացյալ Նահանգները ցանկանում է խաղաղություն տեսնել Եվրոպայում և Հարավային Կովկասում։ Մենք պատրաստ ենք խոսել ցանկացած կողմի հետ, որը կարող է դրական տեսլական ներկայացնել տարածաշրջանին խաղաղություն բերելու համար»,– ասել է դեսպանը։
Նա ընդգծել է` ԱՄՆ–ն և Եվրոպական միությունը շատ ակտիվ ներգրավված են այդ գործընթացներում, քանի որ տեսնում են, որ Հարավային Կովկասում խաղաղություն և անվտանգություն ունենալը շահեկան է։
Հիշեցնենք, որ հունիսի 27-29-ը Հայաստանի ԱԳ նախարար Արարատ Միրզոյանը և Ադրբեջանի ԱԳ նախարար Ջեյհուն Բայրամովը ԱՄՆ–ում անցկացրել են երկկողմ բանակցություններ: