Թշնամին կրկին կրակել է հայկական դիրքերի ուղղությամբ

Ադրբեջանի զինված ուժերի ստորաբաժանումները կրկին կրակ են բացել Սյունիքում տեղակայված հայկական դիրքերի ուղղությամբ։ Տեղեկությունը հայտնում է ՀՀ պաշտպանության նախարարությունը։

«Հուլիսի 11-ին՝ ժամը 20:50-ին, Ադրբեջանի ԶՈւ ստորաբաժանումները հրաձգային զենքից կրակ են բացել Սև լճի հատվածում տեղակայված հայկական դիրքերի ուղղությամբ»,– ասված է հաղորդագրությունում:

ՊՆ-ն միևնույն ժամանակ հայտնում է, որ Ադրբեջանի ՊՆ հաղորդագրությունն այն մասին, թե իբր ՀՀ ԶՈւ ստորաբաժանումները ժամը  21:15-21:30-ը կրակ են բացել սահմանագոտու արևելյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը:

Նշենք` գերատեսչությունն ավելի վաղ տեղեկացրել էր, որ երեկ` ժամը 17:35-ին, ադրբեջանական ստորաբաժանումները տարբեր տրամաչափի հրաձգային զենքերից կրակ են բացել Տեղի և Սև լճի հատվածում տեղակայված հայկական դիրքերի ուղղությամբ։
Հուլիսի 10-ին, Ադրբեջանը կրակ էր բացել Երասխում կառուցվող մետալուրգիական գործարանի ուղղությամբ։

Լրացված.

Սյունիքի մարզի Տեղ գյուղի հատվածում ադրբեջանական կրակոցի հետևանքով հայ զինծառայող է վիրավորվել։ Տեղեկությունը հայտնում է ՀՀ ՊՆ մամուլի ծառայությունը։