Մարտի 1. «Յոթի գործով» քաղբանտարկյալ Մյասնիկ Մալխասյանը հաղթեց Եվրադատարանում

Մարդու իրավունքների եվրոպական դատարանը որոշում է հրապարակել   Մյասնիկ Մալխասյանն ընդդեմ ՀՀ-ի գործով։

2008թ մարտի 1-ի դեպքերից հետո  Լեւոն Տեր-Պետրոսյանի թիմի անդամ,  պատգամավոր, ԵԿՄ փոխնախագահ Մյասնիկ Մալխասյանը դատապարտվել էր 5 տարի ազատազրկման   հայտնի «Յոթի գործով», եւ  ազատ  էր արձակվել համաներմամբ։    Դիմումատոն պնդել էր, որ իրեն ազատությունից զրկել են ապօրինաբար,  առանց հիմնավոր կասկածների , եւ հայաստանյան դատարանները դա հաշվի չեն առել։

Մարդու իրավունքների եվրոպական դատարանը   Մյասնիկ Մալխասյանի գործով համարել է, որ  կա Ազատության և անձնական անձեռնմխելիության իրավունքի խախտում՝  Կոնվենցիայի  Հոդված 5-ի 1-ին մասի գ․ կետով:

Այսինքն՝  յուրաքանչյուր ոք ունի ազատության և անձնական անձեռնմխելիության իրավունք։ Ոչ ոքի չի կարելի ազատւթյունից զրկել այլ կերպ, քան հետևյալ դեպքերում և օրենքով սահմանված կարգով՝  «անձի օրինական կալանավորումը կամ ձերբակալումը իրավախախտում կատարած լինելու հիմնավոր կասկածի առկայության դեպքում նրան իրավասու օրինական մարմնին ներկայացնելու նպատակով կամ այն դեպքում, երբ դա հիմնավոր կերպով անհրաժեշտ է համարվում նրա կողմից հանցագործության կատարումը կամ այն կատարելուց հետո նրա փախուստը կանխելու համար»։

Հայաստանի կառավարությունը Մյասնիկ Մալխասյանին պետք է վճարի 5085 եվրո նյութական, 7500  եվրո ոչ նյութական եւ 2000  եվրո ծախսերի համար։

Հիշեցնենք, որ Մյասնիկ Մալխասյանը  Մարտի 1-ի դեպքերից հետո մեղադրվել է Քրեական օրենսգրքի 225 հոդվածի առաջին մասով` «զանգվածային անկարգություն կազմակերպելու» համար:

«Յոթի գործ»- ով  մեղադրվում են նախկին արտգործնախարար Ալեքսանդր Արզումանյանը, պատգամավորներ Մյասնիկ Մալխասյանը, Հակոբ Հակոբյանը, Սասուն Միքայելյանը, ՀՀՇ անդամ Գրիգոր Ոսկերչյանը, Սուրեն Սիրունյանը եւ Շանթ Հարությունյանը: