Մեղադրյալ Քոչարյանի գործով դատական նիստերը դռնբաց են լինելու
Ռոբերտ Քոչարյանի պաշտպաններին բավարար ժամանակ տրվել է Մարտի 1-ի գործի նյութերին ծանոթանալու համար, ԱԺ-ում լրագրողներին ասել է ՀՀ գլխավոր դատախազ Արթուր Դավթյանը։
«Մենք կարծում ենք, որ տրված ժամանակը լիարժեք բավարար է այդ ծավալի քրեական գործով: Այստեղ գերխնդիրը ՝ իրավական առումով մեկն է՝ ոչ թե պաշտպանը քանի էջ կարող է կարդալ օրական, այլ որքանով հնարավոր կլինի ապահովել կոնկրետ մեղադրյալի պաշտպանության արդյունավետ իրականացումը:
Մենք էլ գնահատել ենք, որ եղած ժամանակահատվածը բավարար է այդ ծավալի նյութերին, այդ սուբյեկտների կողմից ծանոթանալու: Շտապելու ոչինչ չկար, բայց բոլոր դեպքերում գիտեք, մենք սահման ունենք՝ քրեական գործերը ողջամիտ ժամկետներում քննության»:
Գլխավոր դատախազի խոսքով, գործի քննության նիստերը դռնբաց են լինելու, միաժամանակ չբացառելով, որ կլինեն հատվածներ, որոնց հրապարակային քննությունն իրականցնելու արգելք կդրվի:
Արթուր Դավթյանը չբացառեց նաև, որ ինքը նույնպես ներկա կգտնվի նիստերին, որպես մեղադրող կողմ: