Զախարովան՝ Հայաստանի հետ կենսալաբորատորիաների հուշագրի մասին
Ռուսական կողմը հուսով է, որ Հայաստանի հետ կենսաբանական լաբորատորիաների մասին հուշագիր ստորագրելու գործընթացը չի ձգձգվի, նոյեմբերի 14-ին կայացած ճեպազրույցում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան և հավելել է, որ հուշագիրը ստորագրելու մոտավոր ամսաթվի մասին տեղեկություն չունի։
«Հույս ունենք, որ փաստաթուղթը ստորագրելու գործընթացը չի ձգձգվի», – նշել է Զախարովան։
Նոյեմբերի 11–ին Ռուսաստանի ԱԳՆ ղեկավար Սերգեյ Լավրովը Երևանում ասել էր, որ ռուս մասնագետների` հայկական կենսալաբորատորիաներ մուտք գործելու հուշագրի հետ կապված բանակցություններն ավարտվել են։
Հիշեցնենք, որ ՀՀ արտգործնախարար Զոհրաբ Մնացականյանը ռուս գործընկերոջ հետ բանակցություններից հետո հայտարարել է, որ կենսաբանական անվտանգության հարցը շատ կարևոր է երկրի համար։ Նախորդ տարիների ընթացքում Հայաստանին հաջողվել է գործընկերների հետ համագործակցությամբ ամրապնդել այդ անվտանգության ամրապնդման մեխանիզմը։
Հայաստանում ԱՄՆ դեսպան Լին Թրեյսին խնդիր չի տեսնում այս ոլորտում Հայաստանի ու Ռուսաստանի համագործակցության հարցում:
«Մենք հպարտ ենք Հայաստանի կառավարության հետ կենսաբանական անվտանգության հարցերով համագործակցությամբ՝ դեռ 2008-ից: Այս լաբորատորիաները հենց այդ համագործակցության արդյունքն են»,- նշել է դեսպանը: