Ավետ Գրիգորյան. Ով է կազմել և ով է հանրայնացրել այս տխրահռչակ փաստաթղթերը

Կառավարության, այսինքն Նիկոլ Փաշինյանի, եւ Հայ Առաքելական Սուրբ Եկեղեցու միջեւ իբր հարաբերությունների ճշգրտման հերթական ակցիան, ինչը ՀՀ Սահմանադրության եւ ներեկեղեցական կանոնների ակնհայտ ու կոպտագույն խախտում էր, կազմակերպված էր այնքան անորակ, որ առաջացրեց ավելի շատ հարցեր, քան հստակություն։ 
Հրապարակվեց «Հայտարարություն» վերնագրված երկու  փաստաթուղթ։ 

Երկրորդին արդեն անդրադարձել եմ։

Կարծում եմ, սակայն, որ ավելի անմակարդակ էր կազմակերպված այս ներկայացման առաջին արարը։ 
Հրապարակված առաջին փաստաթղթի (https://armenpress.am/hy/article/1236166), 
ոչ թե տակ, այլ նրան կից ներկայացված էր տասներեք սրբազանների նախապես կազմված ցուցակ։ Հրապարակված ցուցակում առկա էր նրանցից միայն իննի ստորագրությունը։ 

Հարցեր.
1. Ո՞վ է կազմել այս հայտարարությունների տեքստերը, որոնց, չանդրադառնալով բովանդակությանը,  ասենք, որ ե՛ւ կառուցվածքը ե՛ւ ձեւակերպումները, ընդհանրապես շարադրման ոճը, ավելի  նման են չինովնիկական գրասենյակում գրվածի։ Սրբազաններին վայել չէ այսպիսի որակի տեքստեր կազմելը, առավել եւս՝ վավերացնելը։

2. Ինչու՞ է ստորագրողների ցանկը նախապես տպված վիճակում ներկայացվել սրբազանների ստորագրությանը։ 
 Ընդունված է,  որ նման փաստաթղթերին հավանություն տալիս անձը ստորագրում է  եւ ձեռքով էլ ավելացնում իր անուն-ազգանունը եւ ով լինելը։ 

3. Ո՞վ է հանրայնացրել եկեղեցական ներքին հարաբերություններին վերաբերող, ինչ որ տեղ գաղտնապահական մանրամասներ պարունակող, այդ փաստաթղթերը։ Ստորագրողների կողմից տրվե՞լ է համաձայնություն հանրայնացմանը։ Եթե այո, ապա ո՞վ կամ ովքե՞ր են եղել համաձայնություն տվածները։ 

Գալով վարչապետի հետ հանդիպմանը։ 
Ներկաները, որոնց ավելի ճիշտ կլինի կոչել բերման ենթարկվածներ, նստել ու իրենց կոչմանը ոչ վայել լսում էին Փաշինյանի «բարոյախրատական» ելույթը։

Անհայտ մնաց, թե ինչ են խոսել իրենք։ Եթե ասելիքը եղել է միայն ստորագրություններով հայտարարությանը հավանություն տալը, ապա որն էր Փաշինյանի դուռը գնալու իմաստը։ Գուցե այս քայլով հոգեւորականները, ցանկացել են հավատարմության երդում տալ, բացի Աստծուց, նաեւ Փաշինյանի՞ն։ Վերջինիս հաստատում կարելի է համարել նրանցից փաստաթուղթը չստորագրած մեկի այցը Փաշինյանին։

Զերծ մնալով անձնավորումներից, գիտակցաբար չեմ տվել սրբազաններից որեւէ մեկի անունը։

Նպատակս է նախ արձանագրել ներկայացվածը, որպես  Սահմանադրության եւ, ոչ պակաս կարեւոր, ներեկեղեցական կանոնների, ակնհայտ ու կոպտագույն խախտում։

Ու նաեւ մտահոգ ԱՀԱԶԱՆԳ հնչեցնել իրավիճակի հետագա վտանգավոր զարգացումների կապակցությամբ։ 
Զարգացումներ, որոնք ոչ մի կողմի հաղթանակով չեն կարող պսակվել, իսկ տուժողը կլինի միայն մեր երկիրը իր ժողովրդով։

Ավետ Գրիգորյան