Հումանիտար օգնությունը չի հասնում Սիրայի երկրաշարժից տուժած որոշ հատվածներ

Սիրիայում և Թուրքիայում տեղի ունեցած երկրաշարժից ավելի քան մեկ շաբաթ անց Սիրիայի հյուսիս-արևմուտքում գտնվող Ջինդիրես քաղաքը, որը վերահսկվում է ընդդիմության կողմից, դեռ սպասում է միջազգային օգնությանը:

Տարբեր հիմնադրամներ և երկրներ սկսեցին օգնություն ուղարկել երկրաշարժից ավերված գոտիներ, սակայն աղետից մեկ շաբաթ անց շատերը բողոքում են, որ դեռևս դժվարությամբ են հոգում տարրական կարիքները, դիմանում ուժեղ ցրտին:

Իրավիճակը հատկապես հուսահատ է Սիրիայում, որտեղ 12 տարի տևող քաղաքացիական պատերազմը բարդացրել է օգնության աշխատանքները:

Որոշ մարդիկ, ովքեր կորցրել են իրենց տները, AP գործակալությանը պատմել են, որ ոչինչ դեռ չեն ստացել:

Վրանային քաղաք դարձած սիրական բնակավայրի տեղական խորհրդի ղեկավար Մահմուդ Հաֆֆարն ասում է, որ տեղացիները մինչ այժմ կարողացել են մոտ 2500 վրաններ տեղադրել, սակայն մոտ 1500 ընտանիք դեռ մնում է առանց կացարանի գիշերները մինուս 4 աստիճան (Ցելսիուս) եղանակի պայմաններում:

Ամբողջ օգնությունը ստացվել է տեղական գործընկերներից, ասում է Հաֆֆարը, իսկ ՄԱԿ-ից՝ դեռ ոչինչ:

Միավորված ազգերի կազմակերպությունը հայտարարեց Դամասկոսի հետ ՄԱԿ-ի օգնությունը Թուրքիայից ևս երկու սահմանային անցակետերի միջոցով Սիրիայի հյուսիս-արևմուտքում ապստամբների վերահսկողության տակ գտնվող շրջաններ հասցնելու վերաբերյալ համաձայնագրի մասին, սակայն կարիքները դեռ հսկայական են:

Սիրիայի առողջապահության նախարարության տվյալներով՝ ավելի քան 1400 մարդ է զոհվել կառավարության վերահսկողության տակ գտնվող շրջաններում։ Զոհերի թիվն ակնկալվում է, որ դեռ կավելանա:

Ժամանակավոր ճամբարում տեղավորվածներից Ալ Շավին ևս դեռ սպասում է օգնության. «Մենք ուզում ենք, որ մեր ձայնը հասնի ամբողջ աշխարհին, բայց որտե՞ղ է օգնությունը»։