Մահվան հերթական դեպքը զինված ուժերում
Սեպտեմբերի 24-ին դեռևս չպարզված հանգամանքներում պայթյունի հետևանքով մահացել է պայմանագրային զինծառայող Դ. Կ.-ն (զինծառայողի ընտանիքը սահմանված կարգով տեղեկացված է): Այս մասին հայտնում են ՀՀ ՊՆ-ից։
Այսօր պայթյունից զոհված պայմանագրային զինծառայողը Շիրակի մարզի Հայրենյաց գյուղից էր: Տեղեկությունը «Ազատության» հետ զրույցում հաստատեց գյուղի վարչական Գևորգ Մարտիրոսյանը:
Դմիտրի Կյուրեղյանը 23 տարեկան էր: Նրա կրտսեր եղբայրը ևս պայմանագրային զինծառայող է:
Վարչական ղեկավարն ասաց՝ ողբերգական դեպքի մանրամասներին չի տիրապետում: Մարտիրոսյանի տեղեկություններով՝ զինծառայողի մարմինը հավանաբար վաղը կտեղափոխեն գյուղ:
Զինվորի մահվան մասին Պաշտպանության նախարարությունն այսօր կեսօրին հաղորդեց: Բայց դեպքից ժամեր անց էլ ոչ ռազմական գերատեսչությունը, ոչ էլ մահվան հանգամանքներն ուսումնասիրող Քննչական կոմիտեն չեն հստակեցրել՝ ի՞նչ պայթյուն է եղել, որտե՞ղ՝ զորամասո՞ւմ, թե՝ դրանից դուրս: Չի հստակեցվում նաև հարցը, թե արդյոք զինվորը կյանքին վերջ է տվել նռնակի միջոցով, ինչպես մամուլում է շրջանառվում:
Հայտնի է միայն, որ Քննչականում վարույթ է հարուցվել, բայց թե ի՞նչ հոդվածով, դա ևս չեն բացահայտել:
Այս դեպքից առաջ այս տարվա ութ ամիսներին ծառայության հետ կապված հանգամանքներում արդեն 14 զինծառայող է մահացել: