Կարապետ Բադալյան. ՍԴ շուրջ ստեղծված իրավիճակի բաղկացուցիչները

Հարգելի ընկերներ, 
ՍԴ շուրջ ստեղծված իրավիճակի բաղկացուցիչները հետևյալն են.

Մենք ունենք սահմանադրական օրենք, որի համաձայն ՍԴ որոշումներն ընդունում են դատավորները: Ընդ որում, որոշում ընդունելու քվորումի համար առնվազն 5 դատավոր պետք է լինի: Այնինչ, այսօր ՍԴ-ում ունենք երկու դատավոր՝ Արման Դիլանյան և Վահե Գրիգորյան, իսկ մյուսները նախկինում ընտրվել են ՍԴ անդամներ, ում օրենքով այլևս որոշում ընդունելու լիազորություն չի վերապահվել:

Հետևաբար, ՍԴ-ն չի կարող իր գործառույթն իրականացնել օբյեկտիվ պատճառներով:

Ինչ վերաբերում է նախկինում ՍԴ ընդունած որոշումներին, ապա իրավական կայունության ու անվտանգության պահպանության անհրաժեշտությունից ելնելով դրանք պետք է շարունակեն գործել:

Նույն սահմանադրական օրենքը նախատեսում է, որ ՍԴ նախագահը պետք է լինի դատավորների թվից: Հրայր Թովմասյանը դատավոր չի ընտրվել ԱԺ կողմից, հետևաբար նա չի կարող լինել ՍԴ նախագահ:

Տվյալ իրավիճակում, երբ ՍԴ երկու դատավորներից մեկը արձակուրդում է, մնացել է միայն Վահե Գրիգորյանը, ով հարկադրված է ստանձնել ու կատարել ՍԴ նախագահի լիազորությունները՝ մինչև օրենքով սահմանված կարգով հարցի լուծումը:

Հիմա հերթը Դատավորների ընդհանուր ժողովինն է, կառավարությանը և Նախագահին՝ ՍԴ դատավորի թեկնածուներ ԱԺ-ին արագ ներկայացնելու և ՍԴ դատավորական կազմը համալրելու համար:

Հարց է առաջանում, թե նման իրավիճակում ի՞նչ պետք է անեն ՍԴ անդամները: Ողջամիտ տարբերակն, ըստ իս, արժանապատիվ հեռանալը կլինի, բայց անդամները հիմա երևի թե շոկի մեջ են, իսկ այդ իրավիճակում դժվար է հավասարակշռված որոշում ընդունելը: Մեկ երկու օր սպասենք, տեսնենք:

Կարապետ Բադալյան