Մենք գիտենք՝ ովքեր են տերերը. Հետք
Օպերայի շենքին հարող այս տարածքը ԱԺ պատգամավոր Լեւոն Խաչատրյանին հատկացրել է քաղաքապետ Ռոբերտ Նազարյանը: Իհարկե, ամեն ինչ օրինական ձեւակերպված է: Կառավարության 2001թ N 286 հանճարել որոշմամբ պաշտոնյաները (քաղաքի կենտրոնում սրճարաններ միայն նրանք են կառուցում) կարող են ստանալ 20 քմ, իսկ այնուհետեւ սրտների ուզած չափով ընդլայնել այն: Չկա մի սրճարան, որը նման ձեւով ընդլայնված չլինի: Սա օրինական էր: 2002թ մայիսին ընդունվեց այլ որոշում, որով հատկացվում է 20 քմ, իսկ ընդլայնում կարող է արվել միայն 20 քմ-ով: Սակայն այս որոշումը պարզապես չի գործում:
Ավելին՝ Հետք-ում
Երեւանի կենտրոնում կառուցվող սրճարանատերերի մեջ ոչ մի պատահական մարդ չկա: Եթե նույնիսկ անունները որեւէ բան չեն ասում, միեւնույն է` նրանց հետեւում կանգնած են հանրապետությունում ազդեցիկ դիրք ունեցող պաշտոնյաներ: Շարունակում ենք ներկայացնել օպերայի հանրային այգին «զավթածներին»:
«Օնլի մերիմենթ» ՍՊԸ-ն Ազատության հրապարակին հարող տարածքում (Թումանյան փողոցի կողմից) կոմպյուտերային խաղերի սրահ կառուցելու նպատակով հողատարածք էր խնդրել քաղաքապետ Ռոբերտ Նազարյանից:
Քաղաքապետի 2002թ. հունվարի 11-ի թիվ 24 որոշմամբ 10 տարի ժամկետով 20 քմ տարածք է տրամադրվել վերոհիշյալ ընկերությանը: Սրահի սահմանները որոշված էր Երեւանի քաղաքապետարանի ճարտարապետության եւ քաղաքաշինության վարչության կողմից տրված հատակագծով:
Ավելին՝ Հետք-ում
«Մագնոլիա» ՍՊԸ-ին քաղաքապետ Ռոբերտ Նազարյանի որոշմամբ 2002 թ.- սկզբին հատկացվել է 20 քմ տարածք: 2002-ի նոյեմբերին քաղաքապետի մեկ այլ որոշմամբ «Մագնոլիա» ընկերությանը օպերայի եւ բալետի պետական ակադեմիական թատրոնի ծառայողական մուտքի դիմաց տոմսերի վաճառքի եւ սպասարկման սրահի ընդլայնման նպատակով լրացուցիչ տրամադրվել է եւս 20քմ: Իսկ 2002 թ. դեկտեմբերին քաղաքապետարանի ճարտարապետության եւ քաղաքաշինության վաչության պետ Ս. Կոտոլիկյանի մեր հարցմանը պատասխանած գրությամբ «Մագնոլիա» տարածքը կազմում էր 2615 քմ:
Ավելին՝ Հետք-ում
Հանրային զուգարանի փոխարեն
Շատերն են հիշում օպերայի հանրային զուգարանը: Խորհրդային կարգերի փլուզմանը զուգահեռ սկսեց փլուզվել նաեւ այդ զուգարանը: Տարիներ շարունակ չէր գործում` դարձել էր անօթեւանների հավաքատեղի:
2000թ. օգոստոսի 14-ին քաղաքապետ Ալբերտ Բազեյանի թիվ 1006 որոշմամբ ազատության հրապարակին հարող այգու տարածքում գտնվող նախկին հասարակական զուգարանն իր հարակից տարածքով` 650 քմ., վարձակալության իրավունքով հատկացվել է «Ատլաս» ՍՊԸ-ին՝ «զուգարանը վերակառուցելու (ընդծումը մերն է), հանգստի գոտի եւ բացօթյա սրճարան կազմակերպելու նպատակով»:
Իհարկե, ոչ ոք չհետեւեց, որ այստեղ կառուցվի հանրային զուգարան մանավանդ, որ հանրային այգին, որպես այդպիսին այլեւս գոյություն չուներ:
«Ատլաս» ՍՊԸ-ն այստեղ առայժմ կառուցել է «Astral club» սրճարանը: Թե ինչ է լինելու ստորգետնյա այդ կառույցի վերեւի մասում` անհայտ է, քանի որ հաստատված նախագիծն արդեն խախտվել է եւ նախատեսվածից բարձր պատեր են շարվում: Սրճարանաշինության զարգացումները, հնարավոր է, անկանխատեսելի ընթացք ստանան, եւ տերերը, ասենք, որոշեն սրճարանի վերեւի հարկում կառուցել իրենց առանձնատները: Իսկ այժմ ներկայացնենք, թե ինչու է այս ընկերությունն արժանացել նման ուշադրության:
«Օպերայի ուրվականը»
Ընկերությունը Ռոբերտ Նազարյանի որոշմամբ ընդլայնելով տարածքը կառուցել է «Օպերայի ուրվականը» սրճարանը: Սեփականատերը Կենտրոն համայնքի նախկին թաղապետ Արարատ Զուրաբյանի տեղակալ Դավիթ Առաքելյանն է: Սրճարանի տարածքը այսօր կազմում է 1800 քմ:
Դաշնակցականների սրճարանը
«Դաշնակցականների սրճարան», շատերը «Մեղեդի» սրճարանում ժամադրվելուց հենց այսպես էլ ասում են: Սրճարանի տեղում դաշնակցական Միքայել Մանուկյանին 20 քմ տաղավարի համար տարածք է հատկացրել 1997 թ. քաղաքապետ Վանո Սիրադեղյանը: Ո՞վ էր միջնորդել Վ. Սիրադեղյանին այս հատկացման համար, այդպես էլ հնարավոր չեղավ պարզել: Քաղաքապետ Ռոբերտ Նազարյանի որոշմամբ ընդլայնվել է սրճարանի տարածքը եւ հասնելով մինչեւ 1250 քմ: Ամենայն հավանականությամբ, ընդլայնումը կատարվել է ԱԺ-ի նախկին պատգամավոր Սամվել Ավետիսյանի եղբոր համար: Հենց նա է սրճարանի 50 տոկոսի փայատերը:
Շարունակելի...