Փայտ ու վառարան՝ այլընտրանք չունեցողներին. Artsakhtv
Գազամատակարարման վերականգնումից հետո պետական ծրագրով վառարանի եւ վառելափայտի տրամադրման ծրագիրը որոշակի փոփոխությունների է ենթարկվել, տեղեկացնում է Artsakhtv news-ը:
Առաջնահերթությունները վերանայվել, հստակեցվել են: Վառարան ու փայտ տրամադրում են առաջին հերթին խոցելի հատվածին, այս դեպքում նրանց, ովքեր գազով ջեռուցման հնարավորություն չունեն: Ընթացիկ վիճակագրությանն ու ծրագրի հետագա ճակատագին իմ գործընկերներն են ծանոթացել:
Նշենք, որ Արցախից տարբեր ախտորոշմամբ 6 անձ երեկ Կարմիր խաչի միջազգային կոմիտեի միջնորդությամբ և ուղեկցությամբ տեղափոխվել է Հայաստանի բժշկական կենտրոններ, հայտնում է Արցախի առողջապահության նախարարությունը։
Նախարարության ենթակայության տակ գործող բուժհաստատություններում շարունակում են դադարեցված մնալ պլանային վիրահատությունները։
Մինչ այսօր Կարմիր խաչի միջազգային կոմիտեի միջնորդությամբ և ուղեկցությամբ Արցախից Հայաստան է տեղափոխվել ընդհանուր 70 հիվանդ։
Արցախում շրջափակման հետևանքների մեղմմանն ուղղված սոցիալական ծրագրերի շրջանակում ֆինանսական աջակցություն կցուցաբերվի 2022 թվականի դեկտեմբերի 12-ից մինչև ընթացիկ տարվա փետրվարի 1-ն ընկած ժամանակահատվածոււմ աշխատանքից ազատված անձանց:
Այս մասին «Արմենպրես»-ի թղթակցի հետ զրույցում տեղեկացրեց Արցախի Հանրապետության Սոցիալական զարգացման և միգրացիայի նախարար Արմեն Մանգասարյանը:
«Այն աշխատողներն, ովքեր աշխատանքային հարաբերությունների մեջ են գտնվել շրջափակման հետևանքով տուժած ոլորտների սուբյեկտների հետ և ազատվել են աշխատանքից կամ ավարտվել է քաղաքացիաիրավական պայմանագրի գործողության ժամկետը, կդիմեն նախարարություն և կստանան մինչև 68 հազար դրամ աջակցություն: Եթե աշխատավարձը կազմում էր 68 հազարից ցածր, ապա այդ չափով աջակցություն կցուցաբերվի, իսկ ավելի բարձրի դեպքում՝ 68 հազար դրամ»,-հայտնեց գերատեսչության ղեկավարը՝ հավելելով, որ սոցիալական մյուս ծրագրով էլ 2022 թվականի դեկտեմբերի 12-ից մինչև ընթացիկ տարվա փետրվարի 1-ը գրանցված աշխատանք չունեցող անձանց պետությունը կտրամադրի միանվագ ֆինանսական աջակցություն:
«Այս պարագայում չաշխատող են համարվելու նաև չգրանցված աշխատողները: Եթե մինչև 18 տարեկան երեխաներ ունեցող ընտանիքում ծնողներից երկուսը չեն աշխատում, ապա յուրաքանչյուր երեխայի համար կտրամադրվի 40 հազարական դրամ, իսկ եթե ծնողներից մեկը չի աշխատում, ապա 20 հազար դրամ աջակցություն: Միակ ծնողի չաշխատելու դեպքում ընտանիքին կտրամադրվի 40 հազար դրամ»,-մանրամասնեց նախարարը՝ հավելելով, որ սոցիալական աջակցության վերաբերյալ այս որոշումն առաջիկայում կներկայացվի հաստատման:
Հիշեցնենք՝ դեկտեմբերի 12-ի առավոտից փակ է Հայաստանն Արցախին կապող միակ ճանապարհը։ Արցախում սննդի, դեղորայքի խիստ պակաս կա: