Ադրբեջանի ԶՈւ ստորաբաժանումները խախտել են հրադադարի ռեժիմը. ՊԲ
Արցախի Հանրապետության Ասկերանի, Մարտակերտի և Մարտունու շրջանների օկուպացված տարածքներում տեղակայված Ադրբեջանի ԶՈւ ստորաբաժանումները մարտի 2-ին և մարտի 2-ի լույս 3-ի գիշերը խախտել են հրադադարը` կիրառելով հրաձգային զինատեսակներ։ Այս մասին հայտնում է ԱՀ ՊՆ մամուլի ծառայությունը:
Հայկական կողմից տուժածներ չկան։
Հրադադարի խախտման մասին հաղորդվել է ՌԴ խաղաղապահ զորակազմի հրամանատարությանը։
Ըստ Արցախի Պն-ի՝ ներկայումս իրավիճակը շփման գծում հարաբերականորեն կայուն է։
Ավելի վաղ ռուս խաղաղապահները հրադադարի խախտում են արձանագրել Արցախի Ասկերանի շրջանում: Այդ մասին ասված է Լեռնային Ղարաբաղում ռուսական խաղաղապահ զորախմբի գործունեության մասին ՌԴ ՊՆ մարտի 2-ի տեղեկագրում:
«Տուժածներ չկան։ Ռուսական խաղաղապահ զորախմբի հրամանատարությունը փաստի առնչությամբ համատեղ քննություն է անցկացնում ադրբեջանական և հայկական կողմերի հետ»,– ասված է հաղորդագրությունում։
Նախորդ երկու օրերին ևս արցախյան շփման գծում հրադադարի խախտում է արձանագրվել: Ըստ Արցախի ներքին գործերի նախարարության հաղորդագրության՝ Մարտունու շրջանում ադրբեջանական զինված ուժերը հրաձգային տարբեր տրամաչափի զենքերով կրակահերթեր են արձակել քաղաքացիներից մեկի տրակտորի ուղղությամբ, ինչի հետևանքով դադարեցվել են գյուղատնտեսական աշխատանքները:
Նշենք՝ մարտի 3–ին Արցախում հրադադարի ռեժիմի խախտման 3 դեպք էր արձանագրվել Մարտունու և Շուշիի շրջաններում։ Դրանք գրանցել էր նաև ՌԴ խաղաղապահ զորախումբը։
Հիշեցնենք` 2022 թ. դեկտեմբերի 12-ից Ադրբեջանը փակել է Հայաստանն Արցախին կապող միակ ճանապարհը։
Դեկտեմբերի 13-ից ադրբեջանական կողմը ժամանակ առ ժամանակ անջատում է Արցախի գազամատակարարումը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
Արցախում սննդի, դեղորայքի խիստ պակաս կա: