Իրան - ԱՄՆ բանակցությունները կսկսվեն ապրիլի 10-ին՝ Իսլամաբադում (տեսանյութ)
Իրանի Ազգային անվտանգության գերագույն խորհուրդը դրական է արձագանքել ԱՄՆ նախագահ Դոնալդ Թրամփի կողմից հրադադարի մասին հայտարարությանը՝ ընդգծելով, որ ԱՄՆ-ն ընդունել է Թեհրանի 10 կետանոց առաջարկը։
ԱՄՆ-ն, ըստ Իրանի Անվտանգության խորհրդի, համաձայնել է Հորմուզի նեղուցի վերահսկողությունը թողնել Թեհրանին, վճարել փոխհատուցում, վերացնել պատժամիջոցները, թույլատրել ուրանի հարստացումը շարունակել, դուրս բերել զորքերը Մերձավոր Արևելքից...։
ԱՄՆ-ի հետ բանակցությունները կսկսվեն ուրբաթ՝ ապրիլի 10-ին, Պակիստանի մայրաքաղաք Իսլամաբադում: Թեհրանը երկու շաբաթ է հատկացրել բանակցային ողջ գործընթացի համար, որի ընթացքում կհաստատվի հրադադար: Անվտանգության խորհուրդն ընդգծել է, որ ԱՄՆ-ի հետ բանակցությունները չեն նշանակում ԱՄՆ-ի հետ պատերազմի ավարտ:
Իրանի Իսլամական Հանրապետության Արտաքին Գործերի Նախարար Սեյեդ Աբբաս Արաղչիի ուղերձը՝ Ազգային Անվտանգության Գերագույն Խորհրդի անունից.
«...Ի պատասխան Պակիստանի վարչապետի եղբայրական խնդրանքին, որն արտահայտվել է նրա թվիթերյան հրապարակման մեջ, և հաշվի առնելով ԱՄՆ-ի բանակցությունների հայտը՝ իրենց 15 կետից բաղկացած առաջարկների շուրջ, ինչպես նաև` ԱՄՆ նախագահի հայտարարությունը՝ Իրանի 10 կետից բաղկացած առաջարկները որպես բանակցությունների հիմք ընդունելու մասին` սույնով Իրանի Ազգային Անվտանգության Գերագույն Խորհրդի անունից հայտարարում եմ.
- Եթե Իրանի Իսլամական Հանրապետության դեմ հարձակումները դադարեցվեն, ապա մեր հզոր Զինված Ուժերը նույնպես կդադարեցնեն իրենց պաշտպանական հարվածները»։
- Երկու շաբաթ ժամկետով Հորմուզի նեղուցում անվտանգ տեղաշարժը հնարավոր կլինի` Իրանի Զինված Ուժերի հետ համակարգմամբ և հաշվի առնելով առկա տեխնիկական սահմանափակումները»։
«Եթե այս ամենը իրողություն դառնա, կարելի է ասել, որ Իրանը պատմական հաղթանակ է տարել, դիմակայելով երկու միջուկային տերությունների ռազմական հարձակմանը, քանի որ Թրամփը համաձայնվել է ընդունել Իրանի պայմաններով ձևավորված 10-կետանոց փաստաթուղթը որպես բանակցությունների հիմք», գրել է Հայ ազգային կոնգրեսի վարչապետի թեկանծու Լևոն Զուրաբյանը:
Սա Միացյալ Նահանգների հաղթանակն է, որը իրականացրին նախագահ Թրամփը և մեր անհավանական զինվորականները, գրել է Սպիտակ տան մամուլի քարտուղար Քերոլայն Լևիթը. «Էպիկական կատաղություն» գործողության հենց սկզբից նախագահ Թրամփը գնահատել էր, որ սա 4-6 շաբաթ տևողությամբ գործողություն կլինի։
Մեր զինվորների անհավանական կարողությունների շնորհիվ մենք 38 օրում հասել և գերազանցել ենք մեր հիմնական ռազմական նպատակները։
Մեր զինվորականների հաջողությունը ստեղծեց առավելագույն լծակներ՝ թույլ տալով նախագահ Թրամփին և թիմին մասնակցել դժվար բանակցությունների, որոնք այժմ ստեղծել են դիվանագիտական լուծման և երկարատև խաղաղության հնարավորություն։
Բացի այդ, նախագահ Թրամփը վերաբացեց Հորմուզի նեղուցը։
Երբեք մի թերագնահատեք նախագահ Թրամփի կարողությունը՝ հաջողությամբ առաջ տանելու Ամերիկայի շահերը և նպաստելու խաղաղության հաստատմանը», գրել է նա:
Հիշեցնենք՝ ԱՄՆ-Իսրայել համատեղ հարձակումն Իրանի դեմ սկիզբ է առել փետրվարի 28-ին։ Իրանն ի պատասխան հարվածներ է հասցրել Իսրայելին և ամերիկյան ռազմաբազաներ ունեցող Ծոցի երկրներին։