Ճակատենի համայնքապետ. Գնամ, ինչ ասեմ գյուղացիներին (տեսանյութ)

Ճանապարհը փակել են, ես հիմա չգիտեմ` գնամ, ինչ ասեմ գյուղացիներին, news.am-ի հետ զրույցում ասաց  Ճակատենի համայնքապետ Արա Հարությունյանը` անդրադառնալով իրենց գյուղի մոտ  ադրբեջանական մաքսակետ դնելու մասին ԱԱԾ հայտարարությանը:

«Այնտեղ 6 գյուղ կա, զորք ունենք, իշխանական կողմից, անգամ մարզպետարանից ոչ մեկը չի զանգել, չի եկել, ես որքա՞ն կարող եմ երաշխավորագիր տալ մեր համագյուղացիներին: Այսօր 3-4 ընտանիք ասում էր՝ եթե ճանապարհը պիտի փակվի, մեզ շուտ տեղեկացրեք, գոնե երեխաներին հանենք այստեղից, չգիտեի՝ ինչպես պատասխանել այդ հարցին: Կարծես զուգադիպեց ՏԻՄ ընտրություններն ավարտվեցին և միանգամից ճանապարհը փակվեց, դա ինչպե՞ս է լինում»,-ասաց նա: 

Հիշեցնենք.

նոյեմբերի 11-ից փակ է Գորիս-Կապան միջպետական ճանապարհը։ Ադրբեջանն այդտեղ մաքսակետ է տեղադրել՝ կիսաշրջափակման մեջ դնելով առնվազն երեք գյուղ. Բարձրավան, Շուռնուխ և Որոտան գյուղերի բնակիչները կանգնել են հումանիտար խնդիրների առաջ: 

Բարձրավանը երեք օր է՝ փաստացի շրջափակման մեջ է, գյուղի հիմնական՝ անցանելի ճանապարհը, որը միանում է Գորիս-Կապան ճանապարհին, վերջին օրերին չի օգտագործվում:

Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։