Մամիկոն Կանոյան. Հայ Ազգային Կոնգրեսի համակիրներին

Հայ Ազգային Կոնգրեսի համակիրներին

Ընտրություններին դեռ ժամանակ կա, բայց հենց այս փուլում է որոշվում արդյունքի զգալի մասը՝ ոչ միայն քարոզչությամբ, այլ առաջին հերթին համակիրների կազմակերպվածությամբ, կարգապահությամբ և քաղաքական հասուն մոտեցմամբ։

1. Այս օրերին փորձ է արվելու մարդկանց համոզել, թե պետք է քվեարկել ոչ թե սեփական քաղաքական համոզմունքով, այլ այս կամ այն «ավելի անցողիկ» համարվող ուժի օգտին։ Այս տրամաբանությունն է տարիներ շարունակ վերարտադրել նույն քաղաքական փակ շրջանը, որտեղ ընտրությունը կատարվում է ոչ թե ծրագրի, այլ վախի կամ պահի ազդեցության տակ։ Եթե կարծում եք, որ Հայ Ազգային Կոնգրեսն այն քաղաքական ուժերից է, որն ունի երկրի անվտանգության, տնտեսության, պետական կառավարման և զարգացման իրական, հստակ ու ռազմավարական ծրագիր, ապա ձեր քաղաքական որոշումը պետք է բխի այդ գնահատականից, ոչ թե հոգեբանական ճնշումից։

2. Այս փուլում ամենաարդյունավետ գործիքը անձնական շփումն է։ Ոչ մի գովազդ չի փոխարինի վստահելի մարդու հետ զրույցին։ Յուրաքանչյուր համակիր պետք է աշխատի իր անմիջական շրջապատի հետ՝ ընտանիքի, բարեկամների, ընկերների և գործընկերների հետ։ Պետք է մարդկանց բացատրել մի պարզ իրողություն․ այս ընտրություններում շատերը ներկայացնում են տարբեր մոտեցումներ, սակայն Հայ Ազգային Կոնգրեսը ներկայացրել է պետության վերականգնման մանրամասն և համակարգային ծրագիր։

3. Ցանկացած ներքին բախում ընդդիմադիր դաշտում, փոխադարձ մեղադրանքներ կամ սադրանքներ աշխատում են մեկ ուղղությամբ՝ թուլացնել կենտրոնացված աշխատանքը։ Այս փուլում քաղաքական հասունությունը պահանջում է չմտնել երկրորդական հակամարտությունների մեջ և ռեսուրսը չվատնել աղմուկի վրա։ Էներգիան պետք է ուղղված լինի բացառապես ընտրողի հետ աշխատանքի վրա։

4. Ընտրությունները հաճախ որոշվում են ոչ թե համակիրների ընդհանուր թվով, այլ նրանց կազմակերպվածության մակարդակով։ Պետք է հստակ հասկանալ՝ ով արդեն պատրաստ է քվեարկելու, ով դեռ տատանվում է, ում հետ դեռ պետք է խոսել, և ով ընտրության օրը կարող է մասնակցության խնդիր ունենալ։ Այս փուլում երկրորդական քննարկումները գործնական արժեք չունեն։ Ճիշտ որոշումը բոլոր ռեսուրսները կենտրոնացնելն է մնացած օրերի արդյունավետ աշխատանքի վրա։

Վերջին հաշվով, քաղաքական արդյունքները որոշվում են ոչ թե աղմուկով, այլ կազմակերպվածությամբ, սառնասրտությամբ և կարգապահ աշխատանքով։ Հենց այդ պատճառով այս պահին անհրաժեշտ է մոբիլիզացնել բացարձակապես բոլոր ռեսուրսները։ Հայաստանը կանգնած է մի սահմանագծի առաջ, որտեղ հերթական սխալ քաղաքական որոշումների գինը կարող է լինել չափազանց ծանր, իսկ որոշ հետևանքներ՝ անշրջելի։

ՀԱԿ վարչության անդամ
Մամիկոն Կանոյան