Լևոն Տեր-Պետրոսյան. Մեր սահմանադրությամբ եկեղեցին անջատ է պետությունից: Բացարձակապես անջատ (տեսանյութ)
Մեր սահմանադրությամբ Հայաստանն աշխարհիկ պետություն է, եկեղեցին անջատ է պետությունից։ Բացարձակապես անջատ։
Կարող է իրականում այլ լինել, բայց ըստ սահմանադրության աշխարհի բոլոր քաղաքակիրթ երկրներում եկեղեցին անջատված է պետությունից։ Եւ սա էր լուսավորությունից սկսած, արևմտյան քաղաքակրթության զարթոնքի հիմքը, որ վերջապես պետությունն ազատվեց եկեղեցու տոտալիտար իշխանությունից և կարողացավ ազատ զարգացնել իր գիտությունը, մշակույթը։
Ինձ համար սկզբունքային է, որ եկեղեցին պետությունից անջատ պետք է լինի: Ես 6 տարի դասավանդել եմ ճեմարանում, այսօրվա կաթողիկոսի գործընկերն եմ եղել «Էջմիածին» հանդեսի խմբագրությունում, ինձ համար հարազատ թեմա է, բայց եկեղեցու ռեֆորմների գործը ոչ ձեր, ոչ իմ, ոչ պետության, այլ դա եկեղեցու գործն է։
Լևոն Տեր-Պետրոսյան
03.10.2011
Նշենք, որ Կաթողիկոսին գահից հեռացնելու իշխող «Քաղաքացիական պայմանագիր» կուսակցության թիմի շուրջ մեկ տարի չընդհատվող պայքարը հիմա արդեն նախընտրական ծրագրային դրույթ է:
Մայր Աթոռ Սուրբ Էջմիածինն այսօր հայտարարություն է տարածել, նշելով, որ խստորեն դատապարտում է «Քաղաքացիական պայմանագիր» կուսակցության նախընտրական ծրագրում Հայաստանյայց Առաքելական Սուրբ Եկեղեցու վերաբերյալ մերժելի դրույթների ընդգրկումը։
Հիշեցնենք.
Սահմանադրությունը 17-րդ և 18-րդ հոդվածներով ամրագրում է․
Հոդված 17. Պետությունը և կրոնական կազմակերպությունները
Հայաստանի Հանրապետությունում երաշխավորվում է կրոնական կազմակերպությունների գործունեության ազատությունը:
Կրոնական կազմակերպություններն անջատ են պետությունից:
Հոդված 18. Հայաստանյայց առաքելական սուրբ եկեղեցին
Հայաստանի Հանրապետությունը ճանաչում է Հայաստանյայց առաքելական սուրբ եկեղեցու՝ որպես ազգային եկեղեցու բացառիկ առաքելությունը հայ ժողովրդի հոգևոր կյանքում, նրա ազգային մշակույթի զարգացման և ազգային ինքնության պահպանման գործում:
Հայաստանի Հանրապետության և Հայաստանյայց առաքելական սուրբ եկեղեցու հարաբերությունները կարող են կարգավորվել օրենքով»