Վլադիմիր Կարապետյան. Հրապարակվածը համարում եմ ոչ պատշաճ փաստաթուղթ մեկնաբանության համար
Վարչապետի մամուլի քարտուղար Վլադիմիր Կարապետյանն անդրադարձել է Վենետիկի հանձնաժողովի 119-րդ նստաշրջանի արձանագրության մեջ Հայաստանում ընթացող գործընթացների վերաբերյալ հնչեցրած նկատառումներին:
«Արմենպրես»-ի հարցին, թե ինչպես կմեկնաբանի Վենետիկի հանձնաժողովի նկատառումները՝ Վլադիմիր Կարապետյանը նշեց.
«Նախ` հարցին արդեն իսկ անդրադարձել է ՀՀ արդարադատության նախարարությունը: Նշեմ նաև, որ հրապարակվածը համարում եմ ոչ պատշաճ փաստաթուղթ մեկնաբանության համար: Մենք պետք է նաև հասկանանք, թե ինչպես է ներքին խորհրդապահական փաստաթուղթը հայտնվել մամուլում: Մենք կփորձենք Վենետիկի հանձնաժողովում մեր ներկայացուցիչների միջոցով պարզել այդ հանգամանքը և անել համապատասխան հետևություններ: Ինչպես հայտնի է՝ Վենետիկի հանձնաժողովը որևէ երկրի կամ հարցի վերաբերյալ իր դիրքորոշումը հայտնում է հայտարարությունների և պաշտոնական նամակների կամ գրությունների միջոցով և դա արել էր մայիսի 22-ին՝ վարչապետին հղած նամակով:
Ուզում եմ նաև ընդգծել, որ ՀՀ կառավարությունը մշտական կապի և արդյունավետ համագործակցության մեջ է Վենետիկի հանձնաժողովի գործընկերների հետ և կարևորում է երկկողմ փոխգործակցությունը դատաիրավական բարեփոխումների իրականացման գործում»:
Ավելի վաղ հարցին անդրադարձել է «Իրավունքի Եվրոպա միավորում» իրավապաշտպան հասարակական կազմակերպության նախագահ, փաստաբան Լուսինե Հակոբյանը:
Իսկ փաստաբան Տիգրան Եգորյանը ֆեյսբուքյան իր էջում նշել է.
«Այսօր մի 3-4 լրատվամիջոցով ես և Լուսինեն բացատրել ենք որ հրապարակվածը ոչ միայն Վենետիկի հանձնաժողովի կարծիք, զեկույց կամ եզրակացություն չի այլ նաև չի պարունակում հանձնաժողովի դիրքորոշում և հետևաբար անլուրջ է այդ փաստաթղթի մասին խոսելիս կիրառել կարծիք, եզրակացություն և/կամ այլ հոմանիշներ բառերը. այդ թղթում նշված է միայն մի հոգու կարծիք (Վարդան Պողոսյանի), որը այն փաստի բերումով որ ներկայացվել է նիստին, տեղ է գտել դրա արձանագրության մեջ...»