ՄԽ համանախագահող երկրները հորդորում են կատարել եռակողմ հայտարարության պահանջները
ԵԱՀԿ Նախարարների խորհրդի նիստում Մինսկի խմբի համանախագահող երեք պետությունների արտաքին գերատեսչությունների պատվիրակությունների ղեկավարները՝ Ռուսաստանի արտգործնախարար Սերգեյ Լավրովը, Ամերիկայի Միացյալ Նահանգների պետքարտուղարի տեղակալ Սթիվեն Բիգանը և Ֆրանսիայի Եվրոպական և արտաքին հարցերով նախարար Ժան-Իվ Լը Դրիանը ողջունել են Լեռնային Ղարաբաղում և հարակից շրջաններում ռազմական գործողությունների դադարեցումը, որը ձեռք է բերվել Ռուսաստանի նախագահ Վլադիմիր Պուտինի, Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի նոյեմբերի 9-ի համաձայնությամբ:
ԵԱՀԿ Մինսկի խմբի համանախագահող երեք երկրները կոչ են արել հակամարտության գոտուց անհապաղ և ամբողջությամբ հեռացնել բոլոր օտարերկրացի վարձկաններին:
Համանախագահող երեք երկրները Հայաստանին և Ադրբեջանին հիշեցնում են միջազգային մարդասիրական օրենքով ստանձնած պարտավորությունները կատարելու և, մասնավորապես, այդ օրենքներին համահունչ եղանակով գերիների և զոհվածների աճյունների փոխանակումն իրականացնելու անհրաժեշտության մասին:
Ֆրանսիան, Ռուսաստանը և ԱՄՆ-ը կարևորում են տեղահանվածների և փախստականների, այդ թվում՝ վերջին մարտերի բերումով բնակավայրերը լքած մարդկանց վերադարձն ապահով և արժանապատիվ եղանակով երաշխավորելու անհրաժեշտությունը: Եռյակն ընդգծում է շրջանի պատմական և կրոնական ժառանգությունը պաշտպանելու և պահպանելու անհրաժեշտությունը:
Համանախագահող երեք երկրները Ադրբեջանին և Հայաստանին կոչ են անում օգտվել հրադադարի հնարավորությունից և ԵԱՀԿ Մինսկի խմբի համանախագահների հովանու ներքո բանակցել հարատև խաղաղություն երաշխավորող պայմանագրի շուրջ: Նրանք հորդորում են կողմերին հնարավորինս արագ տարածաշրջանում ընդունել ԵԱՀԿ Մինսկի խմբի համանախագահներին և վերահաստատել բովանդակային բանակցություններով ու համաձայնեցված ժամանակացույցով առկա հիմնահարցերը բացառապես խաղաղ եղանակով կարգավորելու ձգտումը: