Նարե Հովհաննիսյան. «Ադրբեջանցիների դիրքերը այնպիսին են, որ ամեն ինչ իրենց նշանառության տակ է»

Քաղաքական 12.10.2021   10:30   154

«Ադրբեջանցիների դիրքերը այնպիսին են, որ ամեն ինչ իրենց նշանառության տակ է, և խոսել, որ Գորիսում անվտանգ է, սխալ է կամ գոնե հետևանք է այն բանի, որ իրականության մասին ռեալ պատկերացում չունեն»,- ԳԱԼԱ-ի հետ զրույցում հայտնեց իրավապաշտպան Նարե Հովհաննիսյանը, ով Գորիսից է և պարբերաբար այցելում է Սյունիքի սահմանամերձ համայնքներ՝ տեղում ծանոթանալով խնդիրներին:

«Գորիսից Որոտան մտնելիս 3կմ-անոց հատվածում, որտեղ ադրբեջանցիները անցակետ են տեղակայել, այդ հատվածում վտանգավոր է նաև հայերի համար, որովհետև տվյալ հատվածում երկու կողմից ադրբեջանցիներն են: Վերջերս, երբ անցնում էինք այդ հատվածով, այնտեղ ոչ միայն ադրբեջանցի զինվորականներ էին, այլ նաև քաղաքացիական անձինք էին, ովքեր շինարարական աշխատանքներ էին անում: Ադրբեջանցի զինվորականներն ամբողջությամբ սպառազինված են, և դա բավականին ճնշող է, որովհետև դու փաստացի հայտնվում ես թշնամու տարածքում և որևէ երաշխիք չունես, որ եթե ինչ-որ մի բան ադրբեջանցիների քիմքին հաճելի չլինի, դու այդ հատվածից կկարողանաս դուրս գալ:

Դեպի Որոտան տանող ճանապարհահատվածում ադրբեջանցիները դեպի Ադրբեջան մուտք ազդարարող ցուցանակ են տեղադրել «Բարի գալուստ Ադրբեջան». սա բավականին ճնշող է»,-  հայտնեց իրավապաշտպան Նարե Հովհաննիսյանը:

Իրավապաշտպանի խոսքով՝ Շուռնուխ գյուղը կիսվել է, և 10-ից ավելի տուն անցել է ադրբեջանական կողմի վերահսկողության տակ, դա ցածր դիրքում է, և դիրքերի բաժանումը հետաքրքիր է ստացվել: Երբ մտնում ես այդ հատվածներ, սկզբում ադրբեջանական հսկողության տակ անցած տներն են, հայտնի գոմի կեսն ու կողքի տունը հայկական են: Այդ մի տունն իր կես գոմի հետ ադրբեջանական դիրքի ափի մեջ է գտնվում:

Մյուս տները, որոնք գտնվում են հայկական վերահսկողության տակ, տեղանքի առումով էլի անբարենպաստ են, որովհետև բարձրադիր հատվածում են: Եվ նորակառույց տները, որոնք կառուցվում են իրենց տները կորցրած բնակիչների համար, ադրբեջանական դիրքի դիտակետում են:

Այսինքն՝ ադրբեջանցիները շատ հանգիստ կարող են հետևել մարդկանց շարժին և միևնույն ժամանակ ցանկացած պահի որևէ գործողության դիմել, որովհետև ադրբեջանցիների տեղակայման դիրքը բավականին հարմար է:

Ինչ վերաբերում է Որոտանին կամ ընդհանրապես այդ գյուղի կենսագործունեությանը, ապա մարդիկ այս պահին փաստացի չեն կարող զբաղվել անասնապահությամբ, որովհետև այդ անասունները բնազդով կգան այն տարածքները, որտեղ նախկինում արածել են: Դա խնդիր է, և մարդը հիմա վաճառում է իր անասունները և հետևաբար չի կարող զբաղվել անասնապահությամբ:

Հողագործությամբ զբաղվելու համար էլ պայմաններ չկան, որովհետև մարդիկ իրենց տների հետ կորցրել են նաև իրենց այգիները:

Այն առօրյան, որով գյուղացին զբաղվում էր, հիմա չկա, որովհետև կամ զրկվել է իր հողատարածքից, կամ էլ ինչ որ մնացել է, դա էլ չի բավականացնում: Այս պահի դրությամբ այնտեղ չկան կրակոցներ»,- նշեց Հովհաննիսյանը:

Նարե Հովհաննիսյանը, անդրադառնալով այն հակասական տեղեկություններին, որ մի մասն ասում է՝ Սյունիքն անվտանգ է, իսկ մյուս մասն էլ հակադարձում, նշեց.

«Միանշանակ Սյունիքն անվտանգ չէ, և սա ասում եմ ոչ թե խուճապ առաջացնելու համար, կամ Սյունիքն անվտանգ է ասողներին հակադարձելու համար, այլ դա ասում եմ՝ հաշվի առնելով իրական ռիսկերը:

Ադրբեջանցիների դիրքերը այնպիսին են, որ ամեն ինչ իրենց նշանառության տակ է, և խոսել, որ Գորիսում անվտանգ է, սխալ է կամ գոնե հետևանք է այն բանի, որ իրականության մասին ռեալ պատկերացում չունեն:

Քաղաքում երբ շրջում ես, մարդիկ իրենց հոգսերով ապրում են, որովհետև ադրբեջանցիներն ակտիվ մարտական գործողություններ չեն իրականացնում, իրենց դիրքերում են և ժամանակ առ ժամանակ, երբ «հավես» են ունենում, գերի են վերցնում և անունն էլ դնում, որ հայտնվել են մեր վերահսկողության տակ գտնվող տարածքներում:

Իր տանը ապրող, աշխատող մարդուն չի սպառնում գերի ընկնել, որովհետև այդ դիրքերին մոտ տեղանքներում նման բաներ չեն լինում: Խնդիրն այն է, որ եթե Ադրբեջանը որոշի փակել իրեն հանձնված հատվածները, ապա այդ գյուղերը հայտնվելու են շրջափակման մեջ, և կտրվելու է ոչ միայն Գորիսի հետ կապը, այլև Հայաստանի մյուս բնակավայրերի հետ կապը»,- ԳԱԼԱ-ի հետ զրույցում եզրափակեց իրավապաշտպանը:


Նշենք՝ Նարե Հովհաննիսյանը Գորիս համայնքի ավագանու հոկտեմբերի 17-ի ընտրություններում Հայ Ազգային Կոնգրեսի ցուցակում է։ 

Ներկայացնում ենք կենսագրականը։

Նարե Հովհաննիսյանը ծնվել է 1983 թվականի դեկտեմբերի 8-ին` Գորիսում: Ավարտել է Գորիսի Ակսել Բակունցի անվան դպրոց-վարժարանը:

  • Ունի բանասիրական և իրավաբանական կրթություն։ 2001 թվականին ընդունվել է Գորիսի պետական համալսարան, որը գերազանցությամբ ավարտել է 2006 թվականին՝ ստանալով «Հայոց լեզվի և գրականության» ուսուցչի որակավորում՝ «Հայոց լեզու և գրականություն» մասնագիտությամբ:
  • 2008-2010 թթ. սովորել է Երևանի պետական համալսարանի «Հայ բանասիրության» ֆակուլտետում, որն ավարտել է գերազանցությամբ՝ ստանալով «Բանասիրության» մագիստրոսի աստիճան` «Հայոց լեզու և գրականություն» մասնագիտությամբ:
  • 2017-2019թթ. սովորել և գերազանցությամբ ավարտել է Հյուսիսային համալսարանը՝ ստանալով «Իրավագիտության» մագիստրոսի աստիճան` «Քրեական իրավունք և դատավարություն» մասնագիտությամբ:

Գորիսի պետական համլսարանում ուսանելու տարիներին Նարե Հովհաննիսյանն աշխատել է Գորիսի «Լաստ» հեռուստատեսությունում` որպես հեռուստալրագրող, Գուսան Աշոտի անվան մշակույթի տանը` որպես հանդիսավար: Դպրոցական և ուսանողական տարիներին անդամակցել է Գորիսի «Անակնկալ» մանկապատանեկան կենտրոնին, «Պարմանի» և «Թթենի» ակումբներին, «Գորիսի ստեղծագործողներ» հասարակական կազմակերպությանը:

Ստեղծագործել է դպրոցական տարիներից: Նրա բանաստեղծությունները տպագրվել են «Կանչ», Տաթև համալսարանի, «Զանգեզուր», «Հորիզոն», «Պոլիտեխնիկ», Հայաստանի գրողների միության հրատարակած «Գրեթերթ» և այլ թերթերում, «Նոր դար», «Հայոց լեզու և գրականություն», «Նարցիս» ամսագրերում:

2006 թվականին տպագրվել է Նարե Հովհաննիսյանի «Իմ արյունը թարմ է» բանաստեղծությունների ժողովածուն: 2011թ. նրա բանաստեղծություններն ընդգրկվել են Հայաստանի գրողների միության և Սփյուռքի նախարարության կողմից հրատարակված «Արդի հայ երիտասարդ բանաստեղծներ» անթոլոգիայում, 2013 թվականին՝ «Համազգային հայ կրթական և մշակութային միության» կողմից կազմված «18-33. արդի հայ պոեզիա» անթոլոգիայում, 2017 թվականին՝ «ԳՐԵգիրք» ժողովածուում:

Նարեն ունի բազմոլորտ աշխատանքային փորձ։

  • 2010 թվականից թղթակցել է «Առավոտ» օրաթերթին, «Ամսագիր» էլեկտրոնային թերթին, «Միհր» հայ-իրանական հանդեսին:
  • 2013 թվականին որպես բաժնի համակարգող աշխատել է Երևանի Ավ․ Իսահակյանի անվան կենտրոնական գրադարանի «Բրիտանական կենտրոնում», իսկ 2014 թվականին որպես վարչական քարտուղար աշխատել է Հայաստանի ամերիկյան համալսարանի «Շարունակական կրթության» բաժնում:
  • 2017-2021թթ. համակարգել է ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի հանրային կապերի և հաղորդակցության աշխատանքները:
  • 2011 թվականից աշխատել է մարդու իրավունքների պաշտպանության ոլորտում: 2017 թվականին հիմնադրել և ղեկավարում է «Իրավական նախաձեռնությունների կենտրոն» իրավապաշտպան հասարակական կազմակերպությունը:
  • Իր հիմնադրած կազմակերպության կողմից 2019 թվականին անդամակցել է ՀՀ քննչական կոմիտեի մոնիթորինգային խմբին, 2019-2020թթ.՝ հոգեբուժական hաստատությունների դիտորդական խմբին, 2017 թվականից մինչ այժմ՝ ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբին:

Անկուսակցական է:

 Լուսանկարներ

  Կիսվեք սոցցանցերում


 Պիտակներ
         Նարե Հովհաննիսյան, Գորիս, Սյունիք, ՏԻՄ ընտրություններ, ՀԱԿ

 Նմանատիպ նյութեր

  НОВОСТИ ПАРТНЕРОВ
Copyright © 2015 NewsLine. Design created by Fon