Վճռաբեկ դատարանը վարույթ է ընդունել Ռոբերտ Քոչարյանին գրավի դիմաց ազատ արձակելու որոշման դեմ բողոքները. Հետք

Մարտի 1 08.10.2020   20:20   6484

Վճռաբեկ դատարանը վարույթ է ընդունել Հայաստանի երկրորդ նախագահ Ռոբերտ Քոչարյանին գրավի դիմաց ազատ արձակելու որոշման դեմ գլխավոր դատախազ Արթուր Դավթյանի, Քոչարյանի պաշտպան Հայկ Ալումյանի և տուժողների իրավահաջորդների ներկայացուցիչների բողոքները: Այս մասին տեղեկանում ենք «Դատալեքս» դատական-տեղեկատվական համակարգից, գրում է Հետքը

Նշենք, որ Վերաքննիչ քրեական դատարանը՝  նախագահությամբ դատավոր Արսեն Նիկողոսյանի, հունիսի 18-ին որոշել է Քոչարյանին 2 մլրդ դրամ գրավի դիմաց ազատ արձակել:

Այս որոշման դեմ ներկայացված վճռաբեկ բողոքում Քոչարյանի պաշտպան Հայկ Ալումյանը նշել է, որ նրա նկատմամբ խափանման միջոց կիրառելու հիմքեր չկան, նույնիսկ եթե դատարանը գտել է, որ այդպիսի հիմք կա, ապա Քոչարյանի նկատմամբ կարող էր խափանման միջոց ընտրվել անձնական երաշխավորությունը: Բողոքի երրորդ փաստարկը վերաբերել է գրավի աննախադեպ մեծ չափին:

Տուժողներն ու դատախազությունը, վճռաբեկ բողոք ներկայացնելով, դիրքորոշում են հայտնել, որ բացի կալանավորումից՝ խափանման որևէ այլ միջոց ի զորու չէ ապահովել Ռոբերտ Քոչարյանի պատշաճ վարքագիծը:
Նշենք, որ «Դատալեքս»-ում առկա տեղեկատվության համաձայն՝ վճռաբեկ բողոքները վարույթ են ընդունվել հոկտեմբերի 5-ին: Վարույթ ընդունելուն դեմ է քվեարկել դատավոր Սերժիկ Ավետիսյանը:

Նշենք, որ բողոքը ներկայացնելուց հետո գլխավոր դատախազ Արթուր Դավթյանը Սերժիկ Ավետիսյանին ինքնաբացարկի միջնորդություն էր ներկայացրել՝ հիմքում դնելով այն հանգամանքը, որ Ռոբերտ Քոչարյանի նկատմամբ որպես խափանման միջոց կիրառված կալանավորումը վերացնելուց և գրավը որպես խափանման միջոց կիրառվելուց հետո զանգվածային լրատվության միջոցներում տեղեկություններ են հրապարակվել այն մասին, որ գրավի գումարի՝ 2 միլիարդ ՀՀ դրամի մեծամասնությունը վճարել են մի քանի գործարար, այդ թվում՝ Սամվել Կարապետյանը, ով Սերժիկ Ավետիսյանի քենակալն է: Ավետիսյանը, սակայն, ինքնաբացարկի միջնորդությունը մերժել էր:

 

 Լուսանկարներ

  Կիսվեք սոցցանցերում


 Պիտակներ
         Ռոբերտ  Քոչարյան, Մարտի 1-ի գործ

 Նմանատիպ նյութեր

  НОВОСТИ ПАРТНЕРОВ
Copyright © 2015 NewsLine. Design created by Fon