Զոյա Թադևոսյան. Ո՛չ, չեք դառնա փորձանք մեր գլխին, թույլ չենք տա, պարո՛ն

Խոսք 26.07.2020   12:00   1210

«Ինձ ճանաչող յուրաքանչյուր անձ ծանոթ է իմ մասնագիտական, բարոյական և մարդկային որակներին։ Խնդրում եմ չմասնակցել ֆեյսբուքյան «պատերազմներին», որևէ մեկին որևէ բան ապացուցելու անհրաժեշտություն չկա»-գրում է ՍԴ դատավորի թեկնածու Վահրամ Ավետիսյանը:

Կա՛, պարոն, ապացուցելու շա՜տ բան կա: Ձեր գրառումը թայֆայական տրամաբանությամբ օժտված մարդու պոռթկում է: Հանրային համերաշխության մասին պատկերացում չունենալով՝ խոսում ե՞ք ժողովրդավարությունից, մարդկանց տարանջատելն է՞ վկայում Ձեր բարոյական և մարդկային որակների մասին: ՍԴ անաչառ դատավորի մասին դա է՞ Ձեր պատկերացումը: Գահավիժեցի՛ք, գլխիվար:

Ձեր թեկնածությունը մերժողները իրենց կյանքի լավագույն տարիները զոհել են, մսխել են ժողովրդավարական արժեքներ հաստատելու, ապահով ու արդար պետություն ունենալու վսեմ գաղափարի իրացմանը:

Մարտի 1-ին ժողովրդավարության համար պայքարողներին դատապարտող որոշումները դակող Ձեր սիրասուն հայրն է՞ համամարդկային արժեքների կրողի օրինակ, թե՞ կարծում եք այսքան տարիներ համր լռությամբ դարանակալած և պատեհ առիթը բաց չթողնելով, կատվային ցատկով հրապարակում կհայտնվեք և ընդամենը մեկ գրառումով ժողովրդավար կներկայանաք:

Ձեր չհաջողված ֆբ գրառումով ստացա իմ հարցերի պատախանները: Հասկացա, որ ստվերային կյանքում, անհայտության մեջ վայելել եք մեր կորսված տարիները, հղփացել և հոռացել եք:

Շատ արագ բացահայտվեցիք, թույլ և խոցելի «մարդկային որակների» կրող եք: Իսկ ես ուզում էի հավատալ, որ հրեշից էլ կարող է հրաշքով մարդ ծնվել:

Սխալվեցի: Ո՛չ, չեք դառնա փորձանք մեր գլխին, թույլ չենք տա, պարո՛ն:

Առաջին անգամ իմ կյանքում պետք է ներողություն խնդրեմ որևէ մեկի հանդեպ դրական տրամադրվածության համար: Գրողը տանի՛ :)

Զոյա Թադևոսյան

Հիշեցնենք, ավելի վաղ հրապարակվել է Մարտի 1-ի գործով քաղբանտարկյալների և զոհերի հարազատների հայտարարությունը` Վահրամ Ավետիսյանին ՍԴ դատավորի թեկնածու առաջադրելու կառավարության որոշման մասին:

 Լուսանկարներ

  Կիսվեք սոցցանցերում


 Պիտակներ
         Զոյա Թադևոսյան, ՍԴ, Վահրամ Ավետիսյան, Մարտի 1-ի գործ

 Նմանատիպ նյութեր

  НОВОСТИ ПАРТНЕРОВ
Copyright © 2015 NewsLine. Design created by Fon