Ալիև. Բաքուն ու Երևանը սկսել են հաղորդուղիները բացելու շուրջ բանակցային գործընթացը
ԵԱՀԿ գործող նախագահ, Շվեդիայի արտգործնախարար Անն Լինդեն երեկ ժամանել է տարածաշրջան՝ Հայաստանի և Ադրբեջանի առաջնորդների հետ քննարկելու ղարաբաղյան խնդիրն ու վերջին պատերազմից հետո ստեղծված իրավիճակը։ Տեղեկությունը հայտնում է ՏԱՍՍ-ը:
Առաջին կանգառը Բաքվում էր, որտեղ նա հանդիպում է ունեցել Ադրբեջանի նախագահ Իլհամ Ալիևի հետ, այնուհետև հանդիպումը շարունակվել է ընդլայնված ձևաչափով:
Ալիևը հայտարարել է, որ Ադրբեջանի և Հայաստանի միջև հաղորդակցության վերականգնումը կարող է ելակետ դառնալ Լեռնային Ղարաբաղի շուրջ հակամարտությունն ամբողջությամբ անցյալում թողնելու համար:
«Մենք արդեն Հայաստանի հետ սկսել ենք հաղորդուղիները բացելու շուրջ բանակցային գործընթացը: Սա նոյեմբերի 10-ին ստորագրված հայտարարության մասն է: Արդեն կայացել են տարբեր մակարդակներում մի շարք հանդիպումներ: Սա կարող է դառնալ շրջադարձային կետ, որ ամբողջությամբ փակվի պատերազմի էջը: Հաղորդուղիների բացումը ձեռնտու կլինի տարածաշրջանի բոլոր երկրների համար, կստեղծի նոր հնարավորություններ, նոր դինամիկա կհաղորդի: Ես անկեղծ եմ ասում՝ Ադրբեջանը դրան պատրաստ է»,- Ալիևի խոսքն է փոխանցել նրա մամուլի ծառայությունը:
Ըստ Ադրբեջանի նախագահի՝ պատերազմից հետո չորս ամիսները «ցույց են տալիս երկու կողմերի կամքը՝ փակելու այս էջը և ուշադրությունն ուղղելու ապագային»:
Իր հերթին, Լինդեն շեշտել է, որ ԵԱՀԿ-ն «կքննարկի, թե ինչ կարող է անել հակամարտության լուծմանը նպաստելու համար»: Նա նշել է, որ այս համատեքստում առաջնահերթությունն է համարում միջազգային իրավունքը, մարդու իրավունքները, հումանիտար իրավունքը, խաղաղությունն ու անվտանգությունը:
Ադրբեջանից հետո Լինդեն կժամանի Երևան: