Արտաշատի քաղաքապետարանում օրենք են խախտում ու. «հա, ձեր գրածը ճիշտ է, բայց թողեք գործ անենք...»

Ի պատասխան նախորդ օրվա իմ հրապարակման՝ այսօր Արտաշատի քաղաքապետարանը տարածել է պարզաբանում (http://artashat.am/Pages/Home/newsdetails.aspx?nID=886#.XXpT29UzbIU)՝ ի վերջո որևէ կերպ չանդրադառնալով կամ անպատասխան թողնելով հետևյալ առանցքային խնդիրները. Մասնավորապես՝

1. Չի նշվել, թե ի վերջո ի՞նչու է ՀՀ կառավարության սահմանած կարգի խախտմամբ սուբվենցիոն ծրագիր ներկայացվել միջգերատեսչական հանձնաժողովի նիստին (կրկին ստիպված եմ գրել՝ ԱՎԱԳԱՆՈՒ ՈՐՈՇՈՒՄԸ ՊԱՐՏԱԴԻՐ Է): Տվյալ դեպքում քաղաքապետարանն անգամ չի էլ հերքում, որ այն ԱՌԿԱ ՉԷ: Համաձայնելով, որ համայնքի  ավագանին 2019 թ. փետրվարից առհասարակ նիստեր չի գումարել: 

2.  2019 թ. հուլիսի 11-ի միջգերատեսչական հանձնաժողովի նիստի վերաբերյալ որևէ տեղեկույթ չկա, որ կփաստի սուբվենցիոն ծրագրի հաստատումը: Եթե այն անգամ առկա էլ է, ապա ստացվում է, որ քաղաքապետարանը մեղմ ասած թյուրիմացության մեջ է գցել ՀՀ տարածքային կառավարման և զարգացման նախարարությանը և ՀՀ Արարատի մարզպետին: Ստիպված եմ հերթական անգամ ընդգծել. 2019 թ. ՀՀ կառավարության 62 որոշման 12-րդ կետի 2-րդ ենթակետը ՊԱՐՏԱԴԻՐ է համարում համայնքի ավագանու որոշումը սուբվենցիոն փաթեթի ներկայացման համար: Այսինքն, ստացվում է, «հաստատվել է» սուբվենցիոն ծրագիր՝ առանց պատշաճ փաստաթղթային հիմքերի, ինչը հերթական անգամ ապացուցում է պաշտոնատար որոշ անձանց ոչ կոմպետենտությունը: Հիմա ամենակարևորի մասին. ՀՀ տարածքային կառավարման և զարգացման նախարարության կայքում հրապարակված տեղեկույթից պարզ է դառնում, որ միջգերատեսչական հանձնաժողովի նիստում ուղղակիորեն ԲԱՑԱԿԱՅՈՒՄ Է կամ նույն է թե Արտաշատ քաղաքի սուբեվենցիոն ծրագրի մասին ԱՌՀԱՍԱՐԱԿ ԽՈՍՔ ՉԿԱ (հղումը կից՝ http://mtad.am/hy/marznerdrum/), ընդ որում ոչ հուլիսի 11-ի, ոչ էլ՝ օգոստոսի 22-ի նիստերի արձանագրություններում:

Փաստորեն, ըստ համայնքապետարանի պարզաբանման, կամ նրանց սխալ պաշտոնական գրություններ են առաքել ՀՀ տարածքային կառավարման և ենթակառուցվածքների նախարար պարոն Ս. Պապիկյանը և ՀՀ Արարատի մարզպետ պարոն Գ. Սարգսյանը, կամ էլ՝ ինչպես նշվեց, սուբվենցիոն ծրագիր ուղղակիորեն չկա և չի էլ կարող լինել, քանի որ ՉԿԱ ԱՎԱԳԱՆՈՒ ՈՐՈՇՈՒՄ:

3. Հաջորդը. ո՞րտեղից պարոն համայնքապետին այդքան վստահություն, որ  Արտաշատի նորընտիր ավագանին ԱՆՊԱՅՄԱՆ հաստատելու է սուբվենցիոն ծրագիրը: Գուցե հետագայում ա՞յլ ծրագիր է մշակվելու և հաստատման ներկայացվելու: Կամ էլ նորընտիր ավագանին ուղղակի համաձայն չի լինելու այդ ձևով ու մեթոդաբանությամբ իրականացվող ծրագրին և առաջարկելու է քաղաքն զարգացման ծրագրով այլ առաջնահերթությունների ի կատարում ածում՝ սկսած սոցիալական խնդիրների լուծումից մինչև նախադպրոցական կրթության որակի բարձրացում: Իրականում, այս հայտարարությամբ ցույց է տրվում համայնքապետի վերաբերմունքը Ավագանու ինստիտուտի հանդեպ առհասարակ, ինչպես նաև՝ հաստատում մեր այն պնդումը, որ ասֆալտային քարոզչությամբ ցանկանում են ընդամենը առավելություն ստանալ ընտրություններում և բարձրացնել իրենց հեղինակությունը: Նոր Հայաստանում հեղինակություն բարձրացնելու ամենուղիղ ճանապարհը կոմպետենտությունն է, զարգացման ռազմավարություն ունենալը և ռազմավարական կառավարման կարողությունների ու հմտությունների տիրապետումը, արդի առաջնորդական հատկանիշներ ունենալը:

4. Այդպես էլ որևէ հստակ բան չի ասվում, թե  ի վերջո ի՞նչու հենց սեպտեմբերի 10-ից, այլ ոչ ասենք սեպտեմբերի 30-ից պետք է մեկնարկեին աշխատանքները: Երբ երկու տարի որևէ էական բան չի արվել քաղաքում, իհարկե, մի քանի օր սպասելը և ընտրական գործընթացը չխաթարելը շատ մեր զիջում պետք է լիներ: ՀՀ ընտրական օրենսգիրքը հստակ նախանշում է թեկնածուների ազատ ու հավասար մրցակցությունը: Ցանկացած ընտրության ժամանակ պետք է պահպանվի այդ կանոնը և որևէ կերպ չպետք է խաթարվի այդ գործընթացը, առավել ևս Ձեր չսիրած Նոր Հայաստանում: 

5. Իսկ, թե ո՞րտեղից ենք ներկայացնում փաստը, որ թեկնածուների մի մասը տեղական իշխանություններին հարող թիմակիցներ են, ապա պետք է, որ նման պաշտոն զբաղեցնող անձինք իմանան, որ կուսակցական պատկանելիություն ունեցող թեկնածուի համար ՊԱՐՏԱԴԻՐ է թեկնածությունն առաջադրելիս դիմումի մեջ նշել այդ փաստը: Երբ լրացնեին այդ պարտադիր դաշտը՝ ամեն ինչ պարզ կլիներ: Այլ ոչ թե լրացնեին, հետո դիմեին ՏԸՀ և փոխեին՝ հեշտությամբ դառնալով անկուսակցականներ (առաջադրված թեկնածուների մասին ԿԸՀ կայքում տեղադրված սկզբնական տվյալները պահպանվել են մեզ մոտ):

6. Ցանկացած սթափ մտածելակերպի տեր մարդու դժվար չէ հասկանալ, թե ի՞նչու է Ձեր իրականացրած քայլը առաջացրել ոչ միայն իմ, այլ թեկնածուների զգալի մասի դժգոհությունը: Տեղի ունեցածը ոչ միայն բացահայտ արհամարանք է պարունակում ընտրական գործընթացի մեջ ներգրավված մնացյալ թեկնածուների հանդեպ, այլև իր մեջ պարունակում է իրավական հետևանքներ հարուցող առերևույթ տարեր: Դուք օգտագործել եք համայնքի բյուջեն ԱՌԱՆՑ սպասելու նորընտիր ավագանու հաստատմանը այն օգտագործելու թույլտվություն ստանալու համար: Այդ հանգամանքը անգամ Դու՛ք չեք հերքում: Շտապողականությունը ամբողջովին բացահայտում է Ձեր իրական նպատակադրումները: 

7. Մեզ համար մեր քաղաքի ցանկացած առաջընթաց, ում կողմից էլ այն նախաձեռնված լինի, ողջունելի է: Մենք ուրախ ենք ՀՀ կառավարությունի սիրելի մեր քաղաքին աջակցելու համար, բայց օրենքի տառին հետևելը ԲՈԼՈՐ քաղաքացիների պարտականությունն է:

Հուսանք այս մտահոգ բարձարձայնումը առավել պարզ դարձրեց, որ ՀՀ-ում դեռևս շարունակվում են հին իշխանություններից մնացած վատ ավանդույթները, որոնց դեմ առաջին հերթին պետք է որ պայքարեին իշխանության մարզային օղակները:  Վերջում ուղղակի հույս ունենք, որ ՀՀ իշխանությունները և այլ պատկան մարմիններ կարձանագրեն այս բացահայտ սխալ գործելոճի իրական նպատակները և միջամտելով թույլ չեն տա Արտաշատում արտահերթ ընտրություններին շարունակել ասֆալտային քարոզչությունը:  

Հարգանքով՝ Վ. Մելքոնյան: