Ծանր վիրավորում ստացած զինծառայողի թոշակավորման հարցը դեռ լուծված չէ
Հուլիսի 23-ին Գեղարքունիքի ուղղությամբ հայ-ադրբեջանական սահմանին միջադեպի հետեւանքով ծանր վիրավորում ստացած Արման Աթասյանը 3 օր առաջ դուրս է գրվել հիվանդանոցից: Տեղեկությունը News.am-ին հայտնել է Արմանի հայրը` Գուրգեն Աթասյանը.
«Վիճակը բավարար է, արդեն 3 օր է, ինչ դուրս է գրվել հիվանդնանոցից, կկազդուրվի եւ մի քանի ամիս անց նորից կվիրահատվի: Եւս մեկ բարդ վիրահատություն է սպասվում աղիների հետ կապված»,-ասել է նա:
Նշենք, որ Արմանին մի անգամ վիրահատել են, հեռացրել մի երիկամը:
Արմանի հայրը նշել է, որ չնայած բոլոր բուժումներն անվճար են եղել, սակայն իր որդու թոշակավորման հարցը վիրավորումը ստանալուց 2 ամիս անց, դեռ լուծված չէ.
«Պետությունից դեռ ոչ մի օգնություն չենք ստացել, դեռ թոշակ չեն տրամադրել որդուս, միայն բուժումներն են անվճար եղել»:
Հիշեցնենք՝ 2021թ. հուլիսի 23-ին՝ ժամը 17:00-ի սահմաններում, Գեղարքունիքի մարզի Կութ համայնքի վարչական տարածքում տեղակայված ՀՀ ՊՆ N զորամասի պահպանության տակ գտնվող մարտական հենակետում հերթապահություն իրականացնելիս, հակառակորդի հետ փոխհրաձգության հետևանքով, հրազենային մարմնական վնասվածքներ են ստացել պարտադիր ժամկետային զինծառայող Արման Գուրգենի Աթասյանը, պայմանագրային զինծառայողներ՝ Լեռնիկ Հենրիկի Նավոյանը և Յուրիկ Աշոտի Օհանյանը:
