Վահե Գրիգորյանը խնդրել է փոքր-ինչ հետաձգել իր երդման արարողությունը
ՀՀ Ազգային ժողովի կողմից ընտրված Սահմանադրական դատարանի նորընտիր դատավոր Վահե Գրիգորյանն Արարատ Միրզոյանին խնդրել է փոքր-ինչ հետաձգել իր երդման արարողությունը՝ մինչ որպես փաստաբան որոշ գործերից հրաժարվելը: «Արմենպրես»-ի հաղորդմամբ՝ Գրիգորյանն այս մասին ասաց ԱԺ-ում իր ընտրությունից հետո լրագրողների հետ զրույցում՝ անդրադառնալով լրագրողի հարցին, թե ինչ է լինելու ՄԻԵԴ-ում այն գործերի վիճակը, որոնց փաստաբանն ինքն է:
«Մոտ 80 գործերով մասնակցում եմ ՄԻԵԴ վարույթներին: Դրանց զգալի մասից արդեն դուրս եմ եկել վերջին օրերին, նախնական նամակներն ուղարկել եմ՝ դատարանին տեղեկացնելով: Խնդրել եմ ԱԺ նախագահին, որ հետաձգի իմ երդման արարողությունը, որ մինչ դա հասցնեմ ոչ միայն ՄԻԵԴ-ի,այլ նաև Հայաստանի ներպետական դատարանների, նաև՝ միջազգային քրեական դատարանին տեղեկացնեմ իրենց ցուցակներից դուրս գալու մասին»,-ասաց Գրիգորյանը:
Նրա խոսքով՝ ինքն այդ ժամանակում պետք է հասցնի դատարաններին տեղեկացնել բոլոր գործերից հրաժարվելու մասին: Այդ գործերը, այդ թվում՝ Մարտի 1-ի զոհերի որոշ իրավահաջորդների գործերը, վերցնելու են ուրիշ իրավաբաններ: Գրիգորյանի խոսքով՝ նրանց հետ նախնական պայմանավորվածությունները կան: Նա վստահեցրեց, որ թողնելու է իր ողջ զբաղվածությունը, դադարեցնելու է ցանկացած ներգրավվածություն որևէ գործում:
ԱԺ նախագահ Արարատ Միրզոյանը հայտնել էր, որ Գրիգորյանի երդման արարողության ժամի և օրվա մասին կհայտարարվի լրացուցիչ:
Ազգային ժողովը Գրիգորյանին ընտրեց ՍԴ դատավորի պաշտոնում հունիսի 18-ին փակ գաղտնի քվեարկությամբ: