Բորել. Աղդամի ճանապարհը Լաչինի միջանցքի վերաբացման այլընտրանք չէ
ԵՄ-ն ի գիտություն է ընդունել Բաքվի՝ Աղդամով ապրանքներ մատակարարելու պատրաստակամությունը, բայց դա Լաչինի միջանցքի բացման այլընտրանք չէ։ Այս հայտարարությունն արել է ԵՄ դիվանագիտության ղեկավար Ժոզեպ Բորելը։
Նա նշել է, որ Բրյուսելը մտահոգված է նախկին Լեռնային Ղարաբաղի ինքնավար մարզի հումանիտար իրավիճակով։Եվրոպայի գլխավոր դիվանագետը հիշեցրել է, որ Լաչինի միջանցքով երթևեկությունը դժվարացել է արդեն ավելի քան յոթ ամիս ՝ ի հեճուկս Արդարադատության միջազգային դատարանի որոշման:
«Ադրբեջանի իշխանությունները պարտավոր են ամենակարճ ժամկետում երաշխավորել անվտանգությունն ու ազատ տեղաշարժը Լաչինի միջանցքով և թույլ չտալ հետագա էսկալացիա»,- նշել է ԵՄ դիվանագիտության ղեկավարը:
Նա ընդգծել է, որ տարածաշրջանում Կարմիր խաչի գործունեությունը լրջորեն տուժել է, և հորդորել է ամբողջությամբ վերսկսել այն՝ ներառյալ բժշկական նպատակներով տարհանումը և մարդասիրական օգնության առաքումը:
Դեղորայքն ու առաջին անհրաժեշտության ապրանքները կա՛մ քիչ են, կա՛մ ընդհանրապես չկան, ինչը ծանր հետևանքներ է ունենում տեղի բնակչության համար։
«Հումանիտար հասանելիության հարցը չպետք է քաղաքականացվի»,- ասված է հայտարարությունում։
Բորելը նշել է, որ Եվրոպական միությունը, և, մասնավորապես, Եվրոպական խորհրդի նախագահ Շառլ Միշելն ակտիվորեն աջակցել են Հայաստանի և Ադրբեջանի միջև հարաբերությունների կարգավորման գործընթացին, ինչպես նաև մասնակցել են Բաքու-Ստեփանակերտ երկխոսության առաջմղմանը։ Նա ընդգծել է, որ դա պահանջում է բոլոր կողմերի իրական հանձնառությունը բանակցությունների արդյունքներին և ընդհանուր շահերի և փոխադարձ վստահության վրա հիմնված ապագային:
Նշենք՝ Հայաստանը երեկ 19 բեռնատարներով մոտ 400 տոննա մարդասիրական օգնություն ուղարկեց արդեն յոթ ամսից ավելի շրջափակման մեջ գտնվող Լեռնային Ղարաբաղ: Հայաստանից մարդասիրական բեռով շարասյունը դեռ սպասում է Լաչինի միջանցքով Արցախ մուտք գործելուն։
Բաքուն Երևանի այս քայլը «սադրանք» է որակել և պնդել, թե «բրյուսելյան պայմանավորվածության համաձայն՝ Աղդամ-Խանքենդի (Ստեփանակերտ-խմբ.) ճանապարհը լիովին պատրաստ է բոլոր տեսակի ապրանքների առաքման համար»։
Հիշեցնենք, որ ավելի վաղ նաև Մոսկվան է ընդգծել Լաչինի միջանցքի արագ ապաշրջափակման անհրաժեշտությունը: