Արցախում Կաշենի հանքավայրի շահագործումը ժամանակավորապես կդադարեցվի
«Բեյզ Մեթըլս» ընկերության ղեկավարության հետ համատեղ որոշում է կայացվել ժամանակավորապես դադարեցնել հանքավայրի շահագործումը մինչև միջազգային էկոլոգիական փորձաքննության ավարտը, հայտնում է Արցախի կառավարությունը:
Նշվում է, որ հաշվի առնելով Ադրբեջանի էկոակտիվիստներ ներկայացող անձանց ստեղծած անառողջ միջավայրն ու միջազգային հանրությանը մոլորեցնելու փորձերը՝ որոշել են դիմել միջազգային կազմակերպություններին՝ գործունեության հետ կապված միջազգային էկոլոգիական փորձաքննություն իրականացնելու համար:
«Բեյզ Մեթըլս» ընկերությունը Մարտակերտի շրջանում գտնվող Կաշենի պղնձամոլիբդենային հանքավայրի շահագործողն է, այն Արցախի խոշորագույն հարկատուներից է։
«Արցախի Հանրապետության կառավարությունը մշտապես կողմնակից է եղել հանքարդյունաբերության ոլորտում միջազգային լավագույն ստանդարտների պահպանմանը և համոզված է, որ միջազգային էկոլոգիական ստանդարտները պետք է կիրառելի լինեն ողջ տարածաշրջանի հանքարդյունաբերող ընկերությունների համար», - ասված է հայտարարության մեջ:
Նշենք՝Ադրբեջանի կառավարությունը հայտարարել էր, թե մոնիտորինգ են սկսում Դրմբոնի ու Կաշենի հանքավայրերում, նույն օրը մի խումբ ադրբեջանցիներ փորձել էին հանքեր մտնել, սակայն արցախցիների արգելքին էին հանդիպել:
Հիշեցնենք՝ դեկտեմբերի 12-ի առավոտից փակ է Հայաստանն Արցախին կապող միակ ճանապարհը։