Պրիգոժին. «Վագների» զինյալները վերադառնում են դաշտային ճամբարներ
«Վագների» զինյալներն իրենց շարասյուներով վերադառնում են դաշտային ճամբարներ. խմբավորման ղեկավար Եվգենի Պրիգոժինի այս հայտարարությունը հրապարակվել է Տելեգրամում նրա մամլո ծառայության կողմից։
«Գիտակցելով ողջ պատասխանատվությունը այն բանի համար, որ երկու կողմերից մեկը ռուսական արյուն է թափելու, մենք շրջում ենք շարասյուները և գնում հակառակ ուղղությամբ՝ դաշտային ճամբարներ՝ պլանի համաձայն»,- ասվում է Պրիգոժինի անունից տարածված հայտարարության մեջ։
Զինյալների առաջնորդի հայտարարությունը հաջորդում է Բելառուսի նախագահականի հաղորդագրությանը, որի համաձայն՝ Ալեքսանդր Լուկաշենկոն բանակցել է Պրիգոժինի հետ, ինչի արդյունքում վերջինս համաձայնել է զինյալների շարժը կանգնեցնելու առաջարկին:
Նշվում է, որ այս պահին սեղանին իրավիճակը հանգուցալուծելու բացարձակապես շահավետ և ընդունելի տարբերակ է՝ «Վագներ» ՄՌԿ–ի մարտիկների անվտանգության երաշխիքներով:
Հիշեցնենք` Դոնի Ռոստովում հունիսի 23–ի լույս 24–ի գիշերը «Վագներ» ՄՌԿ–ի ուժերը գրավել են Հարավային ռազմական օկրուգի շտաբը։ Քաղաքում զինված մարդկանց խմբեր են տեղաշարժվում, քաղաքի ելումուտը վերահսկվում է հսկիչ կետերով։ Այս ամենը տեղի է ունեցել Եվգենի Պրիգոժինի հայտարարության ֆոնին։ Նա ասել էր, իբր ՌԴ ԶՈւ–ն հրթիռա–ռումբային հարվածներ է հասցրել «Վագների» ճամբարներին, ինչը հերքել է և՛ ՊՆ–ն, և՛ ԱԴԾ–ն։ Պրիգոժինի դեմ զինված ապստամբություն կազմակերպելու վերաբերյալ քրեական գործ է հարուցվել։
ՌԴ նախագահ Վլադիմիր Պուտինը ապստամբների գործողությունները որակել է հանցավոր արկածախնդրություն, հարված Ռուսաստանի մեջքին և դավաճանություն, որին հանգեցրել են մեծ հավակնություններն ու անձնական շահերը։
Մոսկվայի, Մոսկվայի և Վորոնեժի մարզերի տարածքներում հնարավոր ահաբեկչությունները կանխելու նպատակով հակաահաբեկչական գործողությունների ռեժիմ է սահմանվել։