Լևոն Զուրաբյանի ասուլիսը. «Հայաստանը կանգնած է ադրբեջանացման սպառնալիքի առջև» (տեսանյութ)
Հայ ազգային կոնգրեսը (ՀԱԿ) կմասնակցի 2026թ. հունիսին կայանալիք խորհրդարանական ընտրություններին, ցուցակը կգլխավորի կուսակցության փոխնախագահ Լևոն Զուրաբյանը:
Կոնգրեսի փոխնախագահ Արամ Մանուկյանն ասաց, որ հենց Զուրաբյանն էլ լինելու է վարչապետի իրենց թեկնածուն: Նա հավելեց՝ այս ամենը նախապես քննարկել և համաձայնեցրել են Հայ ազգային կոնգրես կուսակցության առաջնորդ, Առաջին նախագահ Լևոն Տեր-Պետրոսյանի հետ:
Իր նախընտրական ծրագրի շրջանակում Հայ Ազգային Կոնգրեսն առաջարկում է դեպի Իրան երկաթուղի կառուցել բացառապես Հայաստանի միջով։ Այս մասին լրագրողների հետ հանդիպման ժամանակ հայտնել է Լևոն Զուրաբյանը՝ ներկայացնելով համապատասխան նախագիծը։
Նրա խոսքով՝ «Թրամփի երթուղի» (TRIPP.) նախագիծն ունի մի շարք թերություններ։
Նախ՝ այն կհանգեցնի աշխարհաքաղաքական բախման, քանի որ բացառում է տարածաշրջանում զգալի աշխարհաքաղաքական շահեր ունեցող երկրներին։ «Ռուսաստանը, Չինաստանը, Հնդկաստանը եւ Իրանը բացառված են այս կարգավորումից։ Եվ սա դանդաղ գործողության ռումբ է դնում տարածաշրջանի աշխարհաքաղաքական իրավիճակի տակ»,- բացատրել է Զուրաբյանը։
Երկրորդ խնդիրը, ինչպես նշել է ընդդիմադիր գործիչը, այն է, որ TRIPP-ի իրականացումը կհանգեցնի նրան, որ հայկական բոլոր հաղորդակցությունները կախված կլինեն Ադրբեջանից։ Հետևաբար, Հայաստանը կենթարկվի Բաքվի մշտական ճնշմանը։ Եվ Բաքուն կպահանջի քաղաքական զիջումներ, այդ թվում՝ ժողովրդագրական ոլորտում։ Այս առումով ՀԱԿ-ը ներկայացրել է իր սեփական նախագիծը, որը հիմնված է չինական մի ընկերության կողմից դեռեւս 2016թ․ կատարված հաշվարկների վրա: Մասնավորապես, կուսակցությունն առաջարկում է կառուցել երկաթուղի Գագարինից՝ Գավառով, Մարտունիով, Գորայքով, Սիսիանով, Տաթեւով, Մեղրիով եւ Ագարակով մինչեւ Իրանի սահմանը: «Մենք կարծում ենք, որ այս նախագիծը չպետք է ավարտվի Ագարակով: Պետք է կառուցվի ճանապարհ դեպի Թավրիզ կամ Ջուլֆա: Սա կկապի Հայաստանը Իրանի հետ: Ավելին, դա նաև կստեղծի բոլորովին նոր իրականություն Հայաստանի համար»,- նշել է Լևոն Զուրաբյանը:
Հայաստանը գտնվում է բարդ աշխարհաքաղաքական իրավիճակում, ասել է ասել է Հայ Ազգային Կոնգրեսից վարչապետի թեկնածու Լևոն Զուրաբյանը։
Ընդդիմության առաջնորդը նշել է, որ այս իրավիճակը լուրջ սպառնալիք է ներկայացնում Հայաստանի պետականության համար։ Երկրի իրավիճակը, ավելացրել է նա, ավելի է սրվում ներքին սպառնալիքի՝ վարչապետ Նիկոլ Փաշինյանի գլխավորած գործող իշխանությունների պատճառով:
«Երկիրը գտնվում է սողացող կապիտուլյացիայի վիճակում։ Ադրբեջանն ամեն օր նոր պահանջներ է ներկայացնում Հայաստանին։ Դա վերաբերում է թե՛ անկլավներին, թե՛ այսպես կոչված «Զանգեզուրի միջանցքին», որի իրականացումը կխաթարի մեր ինքնիշխանությունը, թե՛ 300 հազար ադրբեջանցիների «վերադարձին» այսպես կոչված «Արեւմտյան Ադրբեջան», թե՛ ՀՀ Սահմանադրության փոփոխություններին եւ Հայ Առաքելական եկեղեցու վրա հարձակումներին»,- ասել է Զուրաբյանը։
ՀԱԿ փոխնախագահը փաստել է, որ չնայած Փաշինյանի բոլոր հավաստիացումներին, խաղաղություն չի հաստատվել։ Ի վերջո, Ադրբեջանը, ըստ էության, պայմանագիրը չի ստորագրել։
«Հայաստանը կանգնած է ադրբեջանացման սպառնալիքի առջև՝ աստիճանաբար դառնալով Ադրբեջանին ենթակա երկիր։ Բացի այդ, ավտորիտար Ադրբեջանի բարքերը աստիճանաբար սկսում են թափանցել մեր ներքաղաքական կյանք»:
Հայ Ազգային Կոնգրեսը գլխավորում է Հայաստանի Առաջին նախագահ Լևոն Տեր-Պետրոսյանը։
Հիշեցնենք՝ ՀԱԿ-ը կոչ է անում իր բոլոր աջակիցներին և համակիրներին մեզ հետ միասին մասնակցելու դեկտեմբերի 28-ին Մայր Աթոռ Սուրբ Էջմիածնում մատուցվող այս տարվա վերջին կիրակնօրյա պատարագին։
Ամբողջական՝ տեսանյութում.